Оптуобус тохтобулларын туһунан
Среда, 30 Января 2013 16:00
Киин куорат дьаһалтатын уопсастыбаннаһы уонна СМИны кытары үлэҕэ департамена иһитиннэрбитинэн, иллэрээ күн дьаһалтаҕа оптуобус тохтобулларыгар аналлааах суһал мунньах буолбут. Санаттахха, ааспыт нэдиэлэҕэ Дежнев уулуссатыгар баар оптуобус эргэ тохтобула оҕолор үрдүлэригэр сууллубута. Мунньахха этиллибитинэн, Дьокуускайга (куорат кытыыларын аахпакка туран) 502 оптуобус тохтобула баар. Онтон 198 үрдүнэн сабыылаах, сөптөөх оҥоһуулаах, 125 тохтобулга урбаанньыттар кыра маҕаһыын-киоскалары үлэлэтэллэр.
Маҕаһыыннар баар тохтобулларын урбаанньыттар бэйэлэрэ көрөллөр-истэллэр. Ааспыт 2012 сылга «Салгын Кут” хампаанньа 36 саҥа тохтобулу оҥорбута. Бу тохтобуллары куорат олохтоохторо улаханнык сөбүлээбэтэллэр да, саҥа аата саҥа. Бу тохтобуллары хампаанньа бэйэтэ көрөр уонна дьаһайар буолуоҕа. Хаалбыт 37 тохтобуллар уруккуттан баар, эргэ тохтобуллар. Ол иһигэр оҕолор үрдүлэригэр сууллубут Дежнев уулуссатыгар турар тохтобул. Кинилэри куорат хаһаайыстыбата суол кытыытыгар турар эбийиэктэр эрэ курдук хомуйар, ол эрээри бу тохтобуллар куорат балаансатыгар киирсибэттэр эбит. Ол аата ким киэнэ буолаллара биллибэт. Онон куорат дьаһалтатын салайааччыта Айсен Николаев уурааҕынан 2013 сылтан туох баар оптуобус тохтобуллара куорат уокуруктарын управаларын бас билиитигэр киириэхтээхтэр. Ол аата тохтобул ханнык управа сиригэр турарынан диэн буолар. Куорат бүддьүөтүттэн бу сыалга анаан үп көрүллүөхтээх. Билигин киин куорат дьаһалтатын правовой салаата манна сөптөөх докумуоннары бэлэмниир диэн буолбут.
***
Надежда ПАВЛОВА,
Кыым.ру