НОГОВИЦЫН кандидатуратын республика салалтата өйүүр буолан, баһылыктар туруммуттар диэн былааска чугас киһи кэпсиир. Бу киһи этэринэн, Кэбээйи улууһун билиҥҥи баһылыга Семен ТЕРЕХОВ Ыҥырыы ылыллар мунньаҕар кыттыбатах. ТЕРЕХОВЫ кэбээйилэр "олус сөбүлээбэттэрэ" иһиллэр. Ону таһынан, ТЕРЕХОВ салалталаах дьаһалта Сангаар мээрийэтин кытары бэрт тыҥааһыннаах сыһыаннааҕа биллэр. 
Ааrtyk.Ru билэринэн, А.А.НОГОВИЦЫН генеральнай дириэктэрдээх "СР ОДьКХ" ГУТ былырыын-быйыл Кэбээйигэ, Дьааҥыга хас да саҥа хочуолунайдары тутан киллэрдэ. Онон электоратын кытары номнуо үлэ ыыта сылдьар диэн сыаналыахха наада. Ону таһынан, бу икки улууска НОГОВИЦЫНЫ өйүөхтээх  быыбар иннинээҕи ыстааптар номнуо  тэриллиннилэр диэн информация баар. 
***
Санатар эбит буоллахха, Кэбээйи-Дьааҥы уокурук Ил Түмэҥҥэ депутата суох олорор. Константин Ильковскайдара Бурятияттан Госдумаҕа талыллан иллэрээ сыллаахха электоратын уларыппыта.
Биир ааттаах-суоллаах Кэбээйи чулуута - Михаил ЭВЕРСТОВ "хара хадаарбар даҕаны Ил Түмэн быыбарыгар кыттабын" диэн Москваттан саанар сураҕа иһиллэр. Михаил Ильич "саамай сөбүлүүр президенэ" - Вячеслав ШТЫРОВ Дальнай Востокка дуоһунас ылан төннөр күннээх буоллаҕына, кини даҕаны төрөөбүт дойдутун диэки сыҕарыйара сэрэйиллэр. Ханнык дуоһунастаах Кэбээйи пенсионера дойдутугар кэлэрэ өссө биллибэт.
***
"Өскөтүн, Кэбээйи-Үөһээ Дьааҥы биир мандатынан быыбардыыр уокуруктан Ил Түмэҥҥэ  Кэбээйи киһитэ - Александр НОГОВИЦЫН турар буоллаҕына, баартыйа испииһэгинэн Үөһээ Дьааҥы улууһуттан төрүттээх киһи туруохтаах" диэн Ааrtyk.Ru хаһыакка информаторбыт кэпсиир. ЕР испииһэгинэн Дьааҥыттан төрүттээх киһини кими киллэрэллэрэ билиҥҥитэ чуолкай биллибэт.
***
Аартык.ру