2012 сыл бэлиэ түгэнэ --  1:1500000 масштабтаах Саха Республикатыгар хостонор күндү таастар хостонор сирдэрин саҥа картата оҥоһулунна.  Геологическай төрүккэ олоҕуран күндү таастары , сурьманы, хорҕолдьуну хостуурга сөптөөх сыанабылы оҥорор инниттэн Дьааҥы Кулаарыгар, Өймөкөөн Тарыныгар, Дьааҥы уонна Усуйаана оройуоннарынан тайаан сытар Томмуоскай иэнигэр регионнааҕы геолого-геофизическэй чинчийиини ыыттылар.

            Алмааһы хостуурга 30 объекка геологическай чинчийии үлэтэ барда, онтон Дальнай трубка алмаастаҕа билиннэ. Геологтар Майскай кимберлиттээх объект элбэх алмаастааҕын эмиэ бигэргиттилэр. Ааспыт сылга Маят үрэххэ геологическай чинчийии түмүктэннэ.

             Геология республикатааҕы кэмитиэтэ ыччат промышленноска сыстан үлэлииригэр улахан болҕомтотун уурар. Ол курдук, ааспыт сылга ХИФУ 33 устудьуона уопуттаах геологтарга сыһыарыллан "полевой" дэнэр практиканы бардылар. 43 үөрэҕин бүтэрбит ыччат  геологическай партияларга идэлэринэн үлэҕэ киирэн, ситиһиилээхтик үлэлии сылдьаллар.

            Үүммүт сылга федеральнай бюджеттэн үбүлэнэн нефть уонна газ баар сирдэригэр -- Марчахаан уонна Үөһээ Бүлүү иэнигэр сир хамсааһынын үөрэтии үлэтэ түмүктэниэҕэ. Олгуйдаах, Алда-Мэҥэ иэнигэр, Уус-Маайаҕа сири дьөлө хаһыы үлэтэ ыытыллыаҕа.  «Сургутнефтегаз», «Газпром»,  «ЯТЭК» курдук бөдөҥ промыщленнай тэрилтэлэр углеводород саппаастаах  лицензиялаах сирдэргэ салгыы көрдүүр уонна чинчийэр үлэни ыытыахтара.

            Отчуоттуур мунньахха тыл эппит дьон Томтордооҕу уонна Селигдаардааҕы сиртэн хостонор баай саппааһа үгүс сирдэрэ туһаҕа тахсыыларын, аукционнары ыытыы бэрээдэгин туоһуластылар,  урукку Аллаах-Үүннээҕи экспедиция үлэһиттэрин уонна производственнай тэриллэрин туһанарга этии киллэрдилэр, "полевой"  экспедиция усулуобуйатыгар үлэлиир эдэр специалистары бастакы уочарат олорор дьиэнэн хааччыйан, государство өттүттэн өйөбүлү оҥорорго санааларын эттилэр.