Санатар буоллахха, Российскай Федерация Үрдүкү суута, бу дьыаланы көрүүгэ процессуальнай сокуону кэһиилэр баалларынан, СР Үрдүкү суутугар төттөрү ыыппыта. СР Үрдүкү суутун Президиума адвокаттар ааһынар үҥсүүлэрин көрөн баран, Дьокуускай куорат федеральнай суута 2011 сыл ахсынньы 12 күнүгэр таһаарбыт бириигэбэрин уонна СР Үрдүкү суутун холуобунай дьыалаларга коллегиятын 2012 сыл олунньу 14 күнүнээҕи быһаарыытын ааспыт сыл ахсынньы ыйын 26 күнүгэр көтүрбүтэ. Сууттанааччылар Афанасий Максимов, Игорь Чикачев, Игорь Пахомов уонна Владимир Рожин хаайыыттан босхолонон, ханна да барбат туһунан баппыысканан көҥүлгэ сылдьаллар.

Бу дьыл тохсунньу 24 күнүгэр Дьокуускай куорат федеральнай суутугар дьыаланы көрүү, дьэ, саҕаланна. Судьуйа – Валентина Хорулинская, судаарыстыбаннай буруйдааччылар – Екатерина Котеля, Ольга Эверстова. Эмсэҕэлээбит өрүт быһыытынан билиниллибит ЯТЭК уонна «Саханефтегаз» ААУо бэрэстэбиитэллэриттэн ким да кэлбэтэх.

Суут мунньаҕа саҕаланаатын, Афанасий Максимов судьуйа Хорулинскаяны, Дьокуускай куорат федеральнай суутун бүтүн састаабын уонна прокурор Екатерина Котеля кыттыытын утарарын (отвод) биллэрдэ. Хадатаайыстыбаларын ис хоһооно – куорат суутун судьуйалара дьыаланы сиэрдээхтик, объективнайдык көрөллөрүгэр итэҕэйбэтэ, прокурор Котеля ааспыттааҥы суут мунньахтарыгар эмиэ кыттыбыт буолан, хара маҥнайгыттан буруйдуур санаалаах буолуон сөбө.

Маны тэҥэ, Дьокуускай куорат федеральнай суутун бэрэссэдээтэлэ Любовь Летучих кэргэнэ прокуратураҕа үлэлииринэн, оттон судьуйа Хорулинская дуоһунаһынан Летучихха бас бэринэринэн, дьыала тутулуга суохтук көрүллэригэр саарбахтыырын эттэ. Уонна кини Таатта улууһугар пропискалааҕынан, дьыаланы Уус-Алдан улууһун федеральнай суута көрүүтүгэр биэрэргэ көрдөстө.

Бу хадатаайыстыбалары атын сууттанааччылар, адвокаттар бары өйөөтүлэр, оттон, прокуратура үлэһиттэрэ, биллэн турар, утардылар. Түмүгэр, судьуйа бу хадатаайыстыбаларга аккаастаата, онон, дьыала Дьокуускай куорат федеральнай суутугар салгыы көрүллэр буолла. Итиэннэ сууттанааччы Игорь Чикачев интэриэһин көмүскүүр адвокат Юрий Гладких уоппускатыттан тахсарын кэтэһиннэрэн, суут мунньаҕа олунньу 6 күнүгэр диэри көһөрүлүннэ.
***