Буруйдаахтарга холуобунай дьыала тэриллэригэр тиһэҕэр диэри эрэлбин сүтэрбэккэ сылдьыбытым. Ол эрэн, СР Ис дьыала министерствотыттан ааспыт сыл ахсынньы ыйын бүтүүтүгэр туппут эппиэппит ити эрэли бүтэһиктээхтик эстэ.

Дьыала ис хоһоонун сиһилии сырдатар наадата суох, үөһэ этиллибит ыстатыйаларга толору суруллубута. Арай ити кэнники матырыйаалым түмүгэр «...Бара сатаан, Ис дьыала министерствотыгар эрийэн, бу дьыаланан салгыы хайыыр санаалаахтарын туоһуластым. Онуоха пресс-сулууспа начальнига Станислав Платонов «дьыаланы тэрийэри аккаастыыр туһунан уураахха прокуратура быһаарыы ыла илик, ону бигэргэтэр да түгэнигэр, биһиги ааһынар санаалаахпыт, таах хаалларыахпыт суоҕа»диэн кэм эрэли үөскэттэ. Министр Кошелев, кытаатан бу дьыаланы тиһэҕэр диэри туруулаһан, кыайыылаах тахсаргытыгар баҕарабын. Полиция хотторуута – барыбыт хотторуута буолуоҕа» диэн суруйбуппун санатабын.

Станислав Платонов кэлиҥҥи эппиэтиттэн көрдөххө, РФ Силиэстийэлиир кэмитиэтин Саха сиринээҕи управлениета буруйу оҥоруу састааба суоҕунан, холуобунай дьыаланы тэрийэри аккаастыыр туһунан уурааҕын ОВО полицейскайдара Е.Г.Ксенофонтов уонна А.А.Васильев Дьокуускай куорат прокуратуратыгар ааһыммыттар. 2012 сыл сэтинньи 20 күнүгэр бу прокуратура дьыаланы тэрийэри эмиэ аккаастаабыт. ДьиӨэр, урут суруйбутум курдук, прокуратура ити чахчынан бэрэбиэркэ ыытан баран, полиция үлэһиттэригэр күүс туттуллубут диэн быһаарбыта. СР Прокурорун солбуйааччы, юстиция старшай советнига Анатолий Щербаков бэйэтэ илии баттаабыт этэ дии. Уонна кэлэн, кэлин тиһэҕэр, прокуратура эмиэ түҥнэри эргийбит буолан тахсар.

Сэтинньи 10 күнүн, ис дьыала уорганнарын үлэһиттэрин бырааһынньыгын көрсө, министр Виктор Кошелевтан ылбыт интервьюбун аахпыт буолуохтааххыт. Онно бэрт элбэҕи кэпсэппиппит да, хаһыакка барыта тахсыбат, баппат. Ол көрсүһүүгэ ити армян ыччаттара полицейскайдарга саба түспүт дьыалаларын, биллэн турар, эмиэ ыйыппытым (интервьюга киирбэтэҕэ). «Хайдах эрэ хотуулаах соҕустук көмүскэнэн испэккит» диэн кыһыйбыт санаабын аһаҕастык эппитим. Онуоха Виктор Васильевич: «Мин эйиэхэ сиэртибэ-полицейскайдар бүтүн испииһэктэрин биэриэхпин сөп. Полиция үлэһиттэригэр өрөлөһүү, күүһү туттуу күннэтэ тахсар. Ол чахчыларынан силиэстийэ уорганнара сороҕор биһиги сөбүлээбэт, астыммат быһаарыыларбытын таһааралларын хайыахпытый... Мин боломуочуйам суох, бэйэм үлэһиттэрбин көмүскүүргэ» – диэн хоруйдаабыта.

Министр төһө да итинник хоруйдаатар, 2012 сыл сэтинньи 14 күнүгэр, ол эбэтэр, ити кэпсэтии кэнниттэн, РФ Силиэстийэлиир кэмитиэтин Саха сиринээҕи управлениетын салайааччыта Олег Мезрин аатыгар ирдэбил-сурук ыыппыт. Холуобунай дьыаланы тэрийэри аккаастыыр туһунан уураах төһө сокуоннайын уонна оруннааҕын бэрэбиэркэлииргэ. Бу ирдэбил-суругунан Мезрин туох диэн быһаарбытын туһунан Станислав Платонов эппиэтигэр туох да суруллубатах.

Ол быһаарыыны күүтэр да наадата суох, эрдэттэн сэрэйиллэр: силиэстийэ уорганнара хара маҥнайгыттан тутуспут хайысхаларыттан туораабаттар, аккаастаабыт суолларын тутуһуохтара, «сокуоннай уонна оруннаах» диэхтэрэ.

Вера МАКАРОВА,
`Cаха сирэ" хаһыат анал корреспондена.