Вера МАКАРОВА  - Бэрээдэк Биэрэ дьыала ханна-туохха тиийбитин бүгүн билиһиннэрэр:
- Хаста да кырбанан-атаҕастанан, муҥур уһукка тиийэн сааланан, ол эрэн, киһини өлөрбөтөх сууттанааччыны Бүлүү оройуоннааҕы суута алта сылга кытаанах режимнээх хаайыыга көҥүлүн быһарга уурбута. «Сааны ылан, киһи туһаайыытынан ытыы – чахчы буруй. Ол эрэн, киһи оҥорбут буруйугар дьүөрэлии миэрэнэн накаастаныахтаах. Суут элбэх чэпчэтэр өрүттэри учуоттаабыт эрээри, бэл диэтэр, судаарыстыбаннай буруйдааччы усулуобунай миэрэни көрдөөбүтүн үрдүнэн, 6 (!) сылга көҥүлүн быспыта диэн – чахчыта даҕаны, аһара кытаанах бириигэбэр» диэн суруйбутум.

 Сиэрдээх быһаарыы диэн баар буоллаҕына, ити бириигэбэр көтүрүллүөн, дьыала саҥаттан көрүүгэ барыан баҕарбытым. Оннук да буолбут – СР Үрдүкү суута ити дьыаланы 2012 сыл ахсынньы 20 күнүгэр көрөн, дьыаланы суут саҥа састаабынан, саҥаттан көрөрүгэр быһаарбыт. Онон, бу дьыалаҕа бүтэһиктээх туочука турара өссө да эрдэ диэн этиэххэ наада.

Биһиги хаһыаппытын суруттаран эрэ буолбакка, интернет ситимигэр эмиэ хото ааҕаллар. Бу ыстатыйам атын сайтарга эмиэ тахсан, тигээйи уйатын тоҕо тарта диэх кэриҥнээхпин: бүгүҥҥү күннээҕи туругунан 7 тыһ. тахса киһи ааҕан, барыта холбоон 40-ча кэриҥэ киһи бу дьыалаҕа тус санаатын үллэстибит. Бу дьонтон 98 %-на Бүлүү суутун бириигэбэрэ сиэри таһынан кытаанаҕын эппит, ити уураах көтүрүллэн, дьыала хаттаан көрүллэригэр баҕалааҕын биллэрбит.

***
"Aartyk.ru" ИХ.