Онно депутат «дьон нус-хас олоҕун араҥаччылыахтаах уонна сокуон тутуһуллуутун хонтуруоллуохтаах үлэһиттэр бэйэлэринэн бэрээдэги кэстилэр. Дьоҥҥо сэнэбиллээхтик сыһыаннаһан, дьиэ кыылларыгар кырыктаахтык сыһыаннаһан, бэйэлэринэн сокуону кэстилэр. Мин, депутат уонна гражданин быһыытынан, бу үлэһиттэргэ миэрэ ылан, эппиэккэ тардаргытыгар уонна түмүгүн сокуонунан ирдэнэр болдьох иһинэн биллэрэргитигэр көрдөһөбүн» диэн суруйбута. Уонна маннык ис хоһоонноох суругу республика прокурора Анатолий Подласенко аатыгар эмиэ ыыппытын туһунан эппитэ. Оттон биһиги хаһыаппыт бу суругу бэчээттээн туран, республика прокуратуратыгар тута ирдэбил-сурук ыытан, дьыала хаамыытын кэтээн көрөн, түмүгүн сырдатыах буолан эрэннэрбиппит.

Ыстатыйа бэчээккэ тахсаатын, нэдиэлэ иһинэн республика прокуратуратыттан эппиэт кэлбитэ. Республика прокурорун бэйэҕэ куттал суох буолуутун хааччыйыыга старшай көмөлөһөөччүтэ В.А.Умеренко илии баттааһыннаах. Итинник ис хоһоонноох сурук СР Прокуратуратыгар эмиэ киирбитин уонна сулууспанан бэрэбиэркэ бара турарын, түмүгүн кэлин иһитиннэриэхтэрин туһунан.

Дьэ, уонна бу саҥа сылга үктэнээт, ол бэрэбиэркэ түмүгүн туттубут. В.А.Умеренко иһитиннэрэринэн, депутат суругар этиллибит барыта кырдьык буолара бигэргэммит. Ол түмүгэр, СР Прокурора Анатолий Подласенко бирикээһинэн, «Прокуратура үлэһитин этикатын кодексатын» кэспитин иһин, Үөһээ Бүлүү прокурорун көмөлөһөөччүтэ А.П.Лукиҥҥа быыгабар бэриллибит. Оттон Үөһээ Бүлүү прокурорун старшай көмөлөһөөччүтэ А.А.Кировы дуоһунаһыттан босхолоон, прокуратура уорганнарыттан ууратарга диэн быһаарбыттар.

Дьиҥэр, сокуон хараҕынан көрдөххө, бу үлэһиттэр дьайыыларыгар административнай да (түүҥҥү бириэмэҕэ айдаарыы), холуобунай да буруйдар састааптара баар курдук. РФ Холуобунай кодексатын 245-с ыстатыйатын 1 чааһыгар ыйылларынан, кыылга-сүөлгэ кырыктаах сыһыан кинилэр өлүүлэригэр эбэтэр эмсэҕэлээһиннэригэр тиэрдибит буоллаҕына, өскөтүн ол дьайыы күлүгээнниир санааттан оҥоһуллубут буоллаҕына, буруйдаах 180 тыһ. солк. суумаҕа диэри ыстараабынан эбэтэр алта ыйга диэри болдьоххо хаайыынан накаастаныахтаах. Ол туһунан республика прокуратуратын эппиэтигэр ханан да суруллубатах. Бэйэлэрэ туох миэрэ ылбыттарын эрэ иһитиннэрбиттэр.

Вера МАКАРОВА,

"Саха сирэ" анал.корр."
***
Суруналыыс бу сайын эдэр полицейскай уолаттары тутуу кэмигэр  армяннар кырбаабыттара таах хаалбытын туһунан кыһыйан-абаран суруйбуттаах. Ол дьыала ханна-ханна тиийбитин Вера аныгыс суруйуутугар билсиһиннэриэҕэ.
***
Аартык.ру