Ол курдук,  "Профи-Трэвел» туристическай фирма директора Наталья Кривогорницына иһитиннэрбитинэн, быйыл бу тэрилтэ кыраныысса таһыгар былырыыҥҥытааҕар 23%-нан элбэх туриһы Саҥа дьыллата таһаарбыт. Киһи кэрэхсиэҕэ, урукку курдук бөлөҕүнэн буолбакка, биирдиилээн барыан баҕалаах элбээбит.

           
Онон Саха сирин олохтоохторо быйылгы Саҥа дьыллааҕы каникулларын ханнык омук сирдэригэр атаардылар? Чысхаан тымныыттан куотан үгүс киһи Соҕуруулуу-Илиҥҥи Азия туһаайыытын тутуспут. Оттон биирдиилээн барыыны  талбыттар "Дьокуускай-Пекин" авиарейс өҥөтүн хото туһаммыттар. Сүрүннээн дьон биир сырыыга хас да дойдуну кэрийэн кэлэллэрин ордороллор эбит. Ол курдук  Таиланд, Камбоджа, Вьетнам, Сингапур, Гонконг курдук итии дойдуларга Саҥа дьыллааҕы күннэргэ үгүс киһи сынньаммыт.

***

Оттон Саха сиригэр туристыы кэлээччи төһө элбээтэ? "NVpress" Интернет-таһаарыы иһитиннэрбитинэн, төһө да нэдиэлэ устатыгар айаннарын ороскуота ортотунан 30 тыһ. солк. буоллар, Саха сиригэр Саҥа дьылы көрсүөн баҕалаах үгүс эбит.  -- Туристар сөбүлээн кэлэр Бурятия, Алтай уонна Коми республикаларын кытта Саха сирэ биир кэккэҕэ турар. Ааспыт сылга хоту дойду олоҕун-дьаһаҕын кытта билсээри 150 тыһ. турист Саха сиригэр кэлэн барда, -- диэн Россия туроператордарын Ассоциациятын толорооччу директора Майя Ломидзе бэлиэтиир.

Биллэн турар, Тымныы полюһунан аатырбыт Өймөкөөн барахсан аатын ааттаабытынан үгүс турист Дьокуускай аэровокзалыттан быһа онно аттанар. Бу күннэргэ Өймөкөөҥҥө тымныы саамай сатыылаан турар кэмигэр, 60-ча кыраадыстаах тымныыга Новай Зеландияттан фотокорреспондент, Тверь куораттан биир турист кэлэн "сынньана" сыталлар. Фотосуруналыыс Америкаҕа уонна Англияҕа тахсар айылҕа тыйыс усулуобуйатын туһунан суруйар сурунааллары кытта дуогабардаах эбит. Кыраайы үөрэтээччи, "Ыалдьыт дьиэтэ" гостиницаны аһан үлэлэтэр Өймөкөөн төрүт олохтооҕо, туризмы энтузиаст-сайыннарааччы Тамара Васильева тохсунньу 18 күнүгэр -- Кириһиэнньэ тоһуттар тымныытыгар Германияттан 13 суруналыыс Тымныы полюһун туһунан киинэ уста кэлэрин, тохсунньу 21-23 күннэригэр "Турсервис" фирма араас омук сирдэриттэн туристары мунньан аҕаларын туһунан иһитиннэрдэ.

           
***

Ааспыт сылга Ростуризм салайааччыта Александр Радьков суруналыыстары кытта көрсүһүүтүгэр региональнай былаастар туризмы сайыннарыыга ыытар үлэлэрэ мөлтөҕүн бэлиэтээбитэ. Онно салайааччы федеральнай киини кытта сибээстэһэн, бииргэ үлэлээтэххэ Россия регионнарыгар туризм  сайдыаҕар эрэнэрин биллэрбитэ. Бу көрсүһүүгэ Саха сирэ регион бэлиэ уратытын уһулуччу чорботон туризмы сайыннарыыга туттубутун бастыҥ холобур быһыытынан ааттаабыта. "Өссө икки сыллааҕыта бу регион  тымныытын эрэ туһунан билэллэрэ. Чысхаан тымныы кинилэргэ дохуот киллэриэн сөбүн табатык өйдөөн, Саха сиригэр "Тымныы Полюһа -- Өймөкөөн" уонна сиртэн хостонор баайдаах республикаларын пропагандалыыр "Бриллиант фестивала" курдук туристическай бырайыактары тэрийдилэр", -- диэн Ростуризм салайааччыта бэлиэтээбитэ.

Онон биһиги Сахабыт сирэ да, итии күннээх Соҕуруулуу-Илиҥҥи Азия дойдуларын кытта илин-кэлин түсүһэн, туризмы тэрийиигэ чахчы да күөн күрэстэһэр кыахтааҕын көрдөрдө.