Кыһыммыт барахсан баарын биллэрэн, 2013 сыл бастакы күннэриттэн тоһуттар тымныытын дьэ биэрэн эрэр. Бу күннэргэ ичигэс күннэргэ үөрэнэн хаалбыт дьон: “Хаһааҥҥа диэри маннык тымныы күннэр туруохтарай?” -- диэн бэйэ-бэйэлэриттэн сураһаллар.

- Манна киһи долгуйара суох, -- диэн, Тулалыыр эйгэ гидрологиятын уонна мониторинын Саха сиринээҕи управлениетын күнү-дьылы билгэлиир сүрүн специалиһа Юрий Дихтяренко кэпсэтиибитин бэрт холкутук саҕалыыр. -- Дьиҥэр, тохсунньутааҕы күн-дьыл туруга өрүү маннык эбээт. 90-с сыллартан  ахсынньы-тохсунньу ыйдарга турар ичигэс күнү-дьылы кытта тэҥнии үөрэнэн хаалбычча, айманабыт.

             Бүгүҥҥү күҥҥэ Саха сирин улуустарыттан Чурапчыга уонна Тааттаҕа 50 кыраадыс тымныы турар. Тымныы полюстара -- Өймөкөөн уонна Верхоянскай "уларсыһа" сылдьан  50-ча кыраадыс тымныйан ылаллар. Уоннааҕы улуустарга  уонна Дьокуускай куоракка 45-49 кыраадыс тымныы -- кыһыҥҥы кэм нуорматынан. Быйыл, арай, Ленскэйгэ уонна Өлүөхүмэҕэ тымныйда. 45 кыраадыс тымныы -- бу улуустарга 10-12 кыраадыһынан тымныынан ааҕыллар. Урукку сылларга тохсунньуга саамай тымныйбыта 30-ча кыраадыс буолара. Кэлэр нэдиэлэ саҥатыгар 3-4 кыраадыһынан тымныы арыый да намтыы быһыытыйыа да, тохсунньу 19 күнүгэр -- Кириһиэнньэҕэ диэри Сибиир антициклона кэлэн турарынан сибээстээн, республика үрдүнэн тымныы күн-дьыл туруоҕа. Өссө төгүл этэбин: улахан тымныы кэллэ диэн долгуйар табыллыбат, сыл эргиирин бу кэминээҕи нуорматынан тымныы күн-дьыл турар.