Айар коллектив 20 сыллаах үлэтин-хамнаһын чөмчөттө. Концерн генеральнай дириэктэрэ Степан СИВЦЕВ - ДОЛЛУ уонна кылаабынай режиссер Никита АРЖАКОВ "Гражданская доблесть" наҕарааданы ыллылар. Култуура министиэристибэтэ коллектив хас да үлэһитигэр "СР култууратын туйгуна" ааты иҥэрдэ. Миниистир Андрей Барыыһап кэлбэтэх, кини аатыттан миниистир солбуйааччыта Владислав Левочкин тыл эттэ. 
Саха сирин театрдарын салайааччылара тыл эттилэр. Суорун Омоллоон аатынан Опера уонна балет театрын дириэктэрэ Гаврил Местников "Сахафильм" устуудьуйа буолар кэмэ кэллэ диэтэ. Быыкаай харчыга Монака киинэфестиваль бирииһигэр тиксэр киинэни усталларын сөхтө-махтайда. "Дойдуга икки Никкитэ киинэ устар. Биирэ - Никиитэ Михалков, иккиһэ - Никиитэ Аржаков" диэтэ. Оттон Ойуунускай аатынан Саха театрын салайааччыта Анатолий Николаев "Сахафильм" салайааччыта Доллу, режиссера Аржаков икки Саха театры сыанатыттан айар үлэлэрин саҕалаабыттарын санатта. Ол гынан баран "Саха театр артыыстарын киинэлэригэр кытыннарбаттарыттан" хом санаалааҕын быктарда.  Итини мустубут дьон өйдөөбөтүбүт. Көрөөччүлэр театр артыыстара "Сахафильм" хартыыналарыгар барытыгар кэриэтэ кытталларын санаатыбыт. Баҕар, Анатолий Николаевич бэйэтин туһугар "хомойбута" буолуо.
Биэчэр сиэрин-туомун кэнниттэн Доллу бинсээгин түөһэ кэчигирэччи кылабачыгас мэтээл буолла. "Кукаакы кулуба курдукпун" диэн уочараттаах наҕараада кэнниттэн Доллу күлэр. 
"Сахафильм" автономнай тэрилтэ салайааччыта Дмитрий Шадрин - Шандор бу киэһэҕэ салайааччы быһыытынан сыанаҕа хонойон олорбото, "детсадын" табаарыһын Алексей Егоров-Өркөнү кытары биэчэри тэрийээччи сүүрэр-көтөр уолаттар оруолларыгар сырыттылар. Туһугар дьикти соҕус...
Дьикти кэнниттэн бу сайын "Сахафильм" устубут "Дьикти саас" киинэлэрин көрдөрдүлэр. Шандор итэҕэс-быһаҕас баар буоллаҕына сайтпытыгар киирэн бэлиэтэнээриҥ, көннөрүнүөхпүт диэтилэр.
Режиссер Никита Аржаков олус үчүгэй ыраас баҕайы киинэни устубут. Оруолларга улахан артыыстартан Иннокентий Дакаяров, Айаал Аммосов онтон да атын Саха театрын артыыстара бааллар. Дакаяров совхоз председателин оруолун оонньуур. Дьөлө күрбүөтээн, эрилис-турулус көрүтэлээн уордаах председатель ("Орда" киинэҕэ төттөрүтүн кини оонньообут Хаана бэрт сымнаҕас сирэйдээх-харахтаах этэ). Театр артыыстара киинэҕэ саҥаралларыгар театральнай интонациялара син биир быгыалаан ааһар. Оттон эдэр оҕолор олус итэҕэтиилээхтик оонньообуттар.
Ордук сүрүн геройу -  Гасаны оонньообут уолу чорбото бэлиэтээтибит. Дьиҥинэн, кэлин олоххо көрбүппүт олус улахана суох уҥуохтаах эдэр киһи эбит, оттон  "камераҕа киирдэҕинэ" сүрэ улаатан арҕастыын сабаҕатыйан көстөр эбит. Энергетикалаах. Ситтэҕинэ-хоттоҕуна "бөө" дииһи.
Уопсайынан, Аржаков уолаттары арыйар эбит. Холобур, "Ильмень үрдүнэн туруйаларыгар" сүрүн оруолга Федот Львову булан оонньоппута. Федот "Ордаҕа" олус талааннаахтык бэйэтин уобараһын айбыта. Билигин кини Тодоровскайга сүрүн оруолу оонньуу сылдьара иһиллэр. "Саха снайперыгар" Дьулустаан Семенов диэн эмиэ уһулуччу киинэ артыыһа буолуох кэриҥнээх уолу булан устубута. Дьулустаан бу киинэҕэ олус итэҕэтиилээхтик, субу баардыы кырдьыктаахтык оруолун тиэрдибитэ. Камера кинини эмиэ "таптыыр", экраҥҥа баарынааҕар букатын улаатан, тупсан көстөр.
*** 
"Дьикти саас" Далан айымньытыттан ис хоһооно атын. Ис хоһоонун кэпсии барбаппыт, көрөөччү бэйэтэ кэмигэр көрүөҕэ уонна сыаналыаҕа дии саныыбыт.
"Сахафильм" эҕэрдэлээччилэригэр кыттыһабыт. 20 сылга кыра бюджеккэ 100-чэкэ киинэни устуу олус улахан ситиһии, төһөлөөх сыра-ньиэрбэ бараммыта буолуой?! Кырдьык, бюджеттэн быһа үбүлэнэр устуудьуйа буолан - улаатыахтарын, кэҥиэхтэрин наада. 
***
Аартык.ру