Тугу ситиспиппитин, туох кыаллыбатаҕын эргитэ саныыгын, аныгыс дьылга үтүөнү чиҥэтэргэ, мөкүнү туоратарга туох-ханнык суолунан барыаххын торумнуугун.
Киһи - айылҕатынан үтүөҕэ таттарыылаах. Доҕотторо, оҕолоро, дьонноро этэҥҥэ сылдьалларыгар баҕарар, санаабыт санаатын ситиһэргэ, туруоруммут соругун толорорго дьулуһар, байылыат олоххо тардыһар, ыраас-сырдык иэйиигэ талаһар.
Дьокуускай - Саха сирин тэбэр сүрэҕэ, түмүллэр күүһэ-уоҕа буолар. Куораппыт барахсан күн-түүн үүнэ-сайда, киэркэйэ туруоҕун республика олохтоохторо бары даҕаны баҕарабыт, ол баҕабыт туоларыгар кыһаллабыт. Ыраас, чэбэр тыыннаах сиргэ олорор киһи өйдүүн-санаалыын ырааһырар, эттиин-сиинниин чэбдигирэр диэн этиигэ мин сөбүлэһэбин, онуоха итэҕэйэбин.
Куорат Думатын дьокутаатын быһыытынан, мин эмиэ Дьокуускайбыт олоҕо туруктаах, экономиката күүстээх, дьоно дьоллоох, ыччата чөл иитиилээх буоларыгар кыһаллабын. Дьон интэриэһин турууластахпына, кимиэхэ эрэ көмө-тирэх буоллахпына дьокутаат да, салайааччы да быһыытынан таах халтай үлэлээбэт эбиппин дии сананабын.
Күндү, куоратым уонна республикам олохтоохторо!
Үүнэр сылга, бу сылга ситиспиккит салгыы чэчирии сайыннын, куһаҕан дьалты хаамтын, дьиэ кэргэҥҥитигэр дьол-соргу сатыылаатын, бэйэ-бэйэҕитин харыстаһыҥ, бөҕө санааланыҥ, сырдык ыраланыҥ! Олохпут чэчирии сайдарыгар күүскүтүн-кыаххытын, сүрэххитин-быаргытын ууран туран үлэлииргитигэр, ол үтүө түмүгү аҕаларыгар баҕарабын!
 
Сергей ЧЕРНЫХ,
Дьокуускай куорат Думатыгар  22-с №-дээх Энергетическэй быыбардыыр уокуруктан дьокутаат.