Өрөбүл күн, куорат Саҥа дьыллааҕы харыйата оҕо-аймах саамай күүтэр абылаҥнаах бырааһынньыгын мэҥэ бэлиэтэ буолан, барык-сарык Дьокуускай халлааныгар суус араас аптаах лаампаны сандаарда уматта.
Үгэс курдук, Великий Устюг куораттан бырдьа бытык Тымныы оҕонньор анаан-минээн айаннаан кэлэн, саха Чысхааныттан дьыбардаах тымныыны  илдьэ барда. Мантан антах Арассыыйа хотуҥҥа дьиҥнээхтик кыһын кэлэн барыахтаах.
Остуоруйаны дьон оҥорор, сүүрүҥүй сүпсүлгэн быыһыгар олохпутугар сылга биирдэ остуоруйа киирэн ааһара эчи кэрэтин диэн билиниэх тустаахпыт. Бырааһынньык бэйэтинээҕэр, кэтэһиитэ-манаһыыта күндү.
Уонча сыллааҕыта учуонай, фантаст-суруйааччы Гаврил УГАРОВ Саҥа Дьыл бырааһынньыгар - "Эһээ Дьыл" диэн персонаһы киллэрбитэ. Сорохтор маны ылымматтар эрээри, дьиҥинэн, саҥа остуоруйа айыллара бэрт буоллаҕа эбээт. Мантан ким да итээн барбат.  Саха сирэ "Тымныы полюһа" бренд хаһаайына буоллаҕына,  биһиги даҕаны кыһыммыт бэйэтэ туспа остуоруйалаах буолуохтаах буоллаҕа.
Чысхаан да, Эһээ Дьыл даҕаны бэйэ-бэйэлэрин ситэрсэр-хоторсор персонаж буоллуннар, оҕолорго дойдуларын айылҕатын кэрэһэлиир, аныгы олох ирдэбилинэн остуоруйа айыллара туох да куһаҕана суох.
***
Аартык.ру