“Дьахтар анала - оһоҕун иннигэр” дииллэринии, “кэрэ аҥара” дэммит ахсааныгар  баара-суоҕа алта  эрэ дьахтар-байыас  киирбит: Михайлова Евгения Исаевна (63 саастаах, ХИФУ ректора),   Габбасова Флида Миргазимовна (59 саастаах, “Айгуль” ХЭТ генеральнай дириэктэрэ, Нерюнгри), Кормилицина Екатерина Ивановна (58 саастаах, урбаан миниистирэ), Голомарева Елена Христофоровна (51 саастаах, Ил Түмэн депутата),  Игнатьева Маргарита Егоровна  (44 саастаах, Роспотребнадзор салайааччыта), Макиенко Ольга Валерьевна (43 саастаах, Ил Түмэн депутата).

***

44 эр бэрдин ахсааныгар саҥа сирэй суоҕун да кэриэтэ. Биллэн турар, икки Жирковтар (Егор уонна Александр), Ким-Кимэн, Басыгысовтаах Балакшин, Борисовтаах Николаевтар (Айсен уонна Михаил), Владимировтар (Афанасий - миниистир, Леонид – ректор), Вадюхиннаах Глушко, Дудниковтаах Евсеев, Куприяновтаах Куркутов, Ларионовтаах Мамедов, Морозкиннаах Подголов, Саввиновтаах Уаров ону кытары Членов – депутаттар, миниистирдэр бааллар.

 Ол быыһыгар биир артыыстаахтар - Саха театрын дириэктэрэ Анатолий Павлов, тустууктара - олимпийскай чемпион Павел Пинигин, быраастара - ККБ№2 кылаабынай бырааһа Николай Васильев, тамадалара -  “КВН”щик Гасан Гасанбалаев, суруналыыстара – “Эхо столицы” редактора Александр Прокопьев, Иван Андросов “Саха” НКИК.

Политсүбэҕэ Чурапчы, Сунтаар, Горнай, Амма кулубалара, Нам баһылыгын солбуйааччыта киирбиттэр.

Уопсайынан аахтахха,  2 доруобуйа харыстабылыттан,  3 үөрэҕирииттэн, 1-дии киһи спортан, наукаттан, култуураттан, СМИттэн 2 киһи киирбиттэр. Баартыйа спонсора - 8 “генерал” баар, 1 урбаанньыт   көстөр.  Уонна, биллэн турар, ситэриилээх былаастан уонна депутаттартан бүтүн 32 киһи лөглөрүһэ сылдьаллар.  15 киһи баартыйа олохтоох бастакы сүһүөх тэрилтэлэриттэн киирбиттэр.

Саамай эдэрдэрэ - 21 саастаах ХИФУ устудьуона Рома Алексеев, кырдьаҕастара – 75 саастаах ГД депутата Михаил Николаев.

***

Ил Түмэн солбуллубат депутаттара - Виталий Басыгысов эһиил 67 туолар, Александр Морозкиннаах Александр Уаров эт саастыылар, онон тутуспутунан  65-гэр сылдьаллар. Бу дьон баартыйа испииһэгинэн  Ил Түмэн быыбарыгар өссө да биэс сылга V-с мунньахха олордохторуна, кинилэрдээҕэр биһиги аспыт маҥхайыыһы...

Икки Жирковтартан “эдэрэ” Александр Николаевич эһиил 57-тин туолар, иккиһэ этэҥҥэ сырыттаҕына 59-н туолан 60-угар үктэниэхтээх.

Онон Ил Түмэммитигэр “хааһахха угуллар” туруктаахтар элбээн иһэллэр.  Ону сүгэр эдэрдэр ахсааннара арай тиийиэ суоҕун сөп.

***

Аартык.ру