Кистэл буолбатах, икки этээстээх мас дьиэлэр киһи уорбалыах элбэхтик умайаллар. Манна, бастатан туран, эргэ дьиэҕэ уот боруобата алдьаммыта-кээһэммитэ төрүөт буолар. Сорох түбэлтэлэргэ арыгыһыт ыаллар уоту ыыталлар, сороҕор “ким эрэ анаан уоттуурун” туһунан сурах-садьык тарҕанар.

Куорат кыһалҕалаах олохтоохторун кытары көрсүһүүнү Энергетическэй быыбардыыр уокурук депутата, ОДьКХ уонна энергетикэҕэ хамыыһыйатын председателэ Сергей ЧЕРНЫХ көҕүлээн тэрийдэ. Сергей ЧЕРНЫХ Гагаринскай уокурук сорох чааһыгар эппиэтинэстээх депутат буолар. Ону таһынан, “соруйан уоттааһын” дьону улаханнык уолутарын иһин бу көрсүһүү тэрилиннэ, депутакка бу туһунан олус элбэхтик үҥсэллэр.

Соторутааҕыта  Гагарин уулуссатын 2№-дээх дьиэтэ умайбыта. Онтон сылтаан Гагарин 4/1 уонна 6, Можайскай 2/1 уонна 10, Циолковскай 3 уонна 5 дьиэлэрин олохтоохторо утуйар уулар көппүт. Кинилэр этэллэринэн, 2№-дээх дьиэ умайыан иннинэ хас да сиргэ баһаар тахса сыспытын дьон бэйэтэ умулларбыт.

Уокурук олохтоохторо саҥа уот боруобатын таттараары бэйэлэрэ ититэр пушканан үрдэрэн подъезтарын, квартираларын  куурдубуттар. Управа “улаханнык көмөлөспөтүн” эппиттэр. “Тутуу бөҕүн-сыыһын хомуйарга дворник анаабыттара даҕаны, ким да, тугу да хомуйбат” диэн үҥсүбүттэр. Бу көрсүһүүгэ управаттан биир да киһи кэлбэтэҕиттэн санаалара түспүт.

Ол да буолар көрсүһүү түмүгүнэн хас да түһүмэхтээх быһаарыы ылыллыбыт:

1. Депутат Гагарин 2№-дээх дьиэтин олохтоохторугар ититэр пушкаларыгар уматык биэриэхтээх.

2. Олохтоохтор уонна депутат күүһүнэн Куорат Думатын депутаттарын, Уоукурук дьаһалтатын, СЭГХ, Гагаринскай уокурук управатын уонна киин куорат полициятын ыҥыран мунньах оҥорорго.  

3. Дьон көрдөһүүтүнэн, депутат куорат ситэриилээх былааһыгар маннык боппуруостары уталыппакка быһааралларыгар туруорсуохтаах:

• Гагаринскай уокурук умайбыт, умайа сысыпыт дьиэлэрин чөлүгэр түһэрии;

• уоттан эмсэҕэлээбит дьиэлэргэ гааһы уонна уоту тардарга хонтуруол баар буолуохтаах;

• түүҥҥү өттүгэр уоруйахтаах айбардаабаттарын курдук, уулуссаларга уонна тиэргэҥҥэ лаампа ыйаныахтаах;

• суһал көһө сылдьар полиция пууна баар буолуохтаах;

• дьиэлэри гидраннарынан хааччыйыы;

• уоттан куттала суох буолууну хааччыйыы.

***

Куорат Думатын пресс-сулууспата иһитиннэрэринэн, Сергей ЧЕРНЫХ көҕүлээн олохтоохтор куорат былааһын кытары көрсүбүттэр.

Олохтоохтор ыйытыыларыгар Дума бастакы вице-спикерэ Павел ПЕТРОВ, Уокурук дьаһалтатын, Госпожнадзор уонна полиция үлэһиттэрэ хоруйдаабыттар.

Дьон бастакы уочарат эргэ дьиэлэртэн көһөрүүнү интэриэһиргээн сураспыттар. Павел ПЕТРОВ онуоха эһиил куорат бюджетыттан 200 мөл. көрүллэр диэн хоруйдаабыт. Кыһалҕаны быһаарарга уопсайа 8 млрд солкуобай наада диэбит. Ону таһынан, мээр Айсен НИКОЛАЕВ сорудаҕынан Можайскай 8№-дээх дьиэтэ эһиил көһөрүллэрин иһитиннэрбит. Онуоха диэри дьиэни кыралаан өрөмүөннүөхтэрэ.

Бу мунньах түмүгүнэн, мээрийэ үлэһиттэригэр сорудах бэриллибит:

• Новикова Г.Д., куораты тутар политиканы сүрүннүүр департамент начальнига: Можайскайга тутуллар элбэх квартиралаах дьиэ тутуутун, чуолаан, уу-хаар ситимин тус хонтуруолугар ыларга, 2012 сыл ахсынньы 15 күнүгэр диэри.

• Кузьмин В.Н., быстах кэмҥэ полиция 3-с отделын началтнигын эб.тол.: 2012 сыл ахсынньы 15 күнүгэр диэри Гагаринскай уокурукка бэрээдэги көрүү күүһүрүөхтээх, соччото суох туруктаах ыаллары кытары өйдөтүүлээх үлэ ыытыллыахтаах.

• Стручков А.Е., Дьокуускай куоракка ЫБМ ГУ солбуйар начальнига: Гагаринскай уокурук баһаары утары охсуһар бэлэмин хонтуруоллуохтаах, итэҕэс-быһаҕас баарын управаҕа биллэриэхтээх, ол суругун куоппуйатын Думаҕа киллэриэхтээх, 2012 сыл ахсынньы 15 күнүгэр диэри.

• Кырджагасов А.А., «СЭГХ» начальнига: Гагарин уулусса 2№-дээх дьиэтин чөлүгэр түһэрии үлэтэ хайдах баран иһэрин отчуоттуохтаах, 2012 сыл сэтинньи 26  күнүгэр диэри.

• Эверстов А.Н., Гагаринскай уокурук баһылыга: ОДьКХ уонна энергетикэ департаменыгар 2013 сылга диэри тупсарыллар үлэ былаанын сайаапкалаан ыытыахтаах (уу-хаар тардыыта, уулуссалары сырдатыы, сыбаалкалары ыраастааһын, дьиэлэргэ киирэр суолу оҥоруу, туһата суох тутуулары көтүрүү о.д.а.,  2012 сыл ахсынньы 15 күнүгэр диэри.

Аартык.ру