Бу дьыл сэтинньи 16 күнүгэр Россия Федерациятын  Үрдүкү суутун холуобунай дьыалалары көрөр Судебнай коллегията норуот депутата Афанасий МАКСИМОВЫ уонна кини бииргэ үлэлээбит коллегаларын Игорь ЧИКАЧЕВЫ, Игорь ПАХОМОВЫ, Владимир РОЖИНЫ утары олоҕо суох тэриллибит 10045 №-дээх холуобунай дьыаланы көрөн баран, дьыаланы Саха Республикатын Үрдүкү суутун Президиума хаттаан көрөрүгэр сорудахтыыр быһаарыыны ылбытын туһунан иһитиннэриини истэн, “Таатта түмсүүтэ” уонна да атын общественнай хамсааһыннар маннык түмүккэ кэллибит:

        - бастатан туран, бу быһаарыы биһиги модун дойдубут Российскай Федерация хас биирдии олохтооҕо суут нөҥүө дьиҥ кырдьыгын таһаарынар кыахтааҕын, онон сибээстээн уопсастыба ону чиҥэтэр сыаллаах-соруктаах сайдыыга хардыылаан эрэрин туоһутунан буолла;

        - иккиһинэн, ханнык баҕарар сайдыылаах киһи-аймах демократическай дойдутугар хас биирдии киһи бырааба, дьоһуна, көҥүлэ өрүү өрө тутуллар. Биһиэхэ эмиэ хас биирдии Россия олохтооҕун быраабын, көҥүлүн ытыктыыр чинчи үөскээн эрэрэ барыбытын үөрдэр уонна санаабытын кынаттыыр.

        - үсүһүнэн, Россия Президенэ В. В. Путин хаһаайыстыбаннай боппуруостары холуобунай дьыалаҕа кубулутан биирдиилээн предпринимателлэри сойуолаһары, эккирэтиһэри, үлэлэрин атахтыылларын бобуохха наадатын этэрэ олоххо киирэн эрэрэ инники сайдыыбытыгар эрэли үөскэтэр.

        “Максимов дьыалата” диэн ааттаммыт 10045 №-дээх холуобунай дьыаланы хара маҥнайгыттан сокуону толоостук кэһэн тэриллибитин Саха Республикатын Президенин иһинэн үлэлиир СР Общественнай Палатата 2012 сыл кулун тутар 2-с күнүгэр 157 №-дээх түмүк оҥорон турар. Онон, кини быһаарыытыгар дьыала хаттаан көрүллэн, буруйдуур бириигэбэр булгуччу көтүрүллүөх тустааҕын туһунан этиллибитэ.

        Көстөн турар кыларыйар кырдьыгы таһаарарга  араас общественнай түмсүүлэр биир санаанан Саха сирин бары олохтоохторугар туһаайан ЫҤЫРАБЫТ:

1. Российскай Федерация Үрдүкү суутун холуобунай дьыалалары көрөр Судебнай коллегиятын быһаарыытынан, Саха Республикатын Үрдүкү Суутун Президиума Саха Республикатын Государственнай мунньаҕын (Ил Тумэн) депутата Афанасий МАКСИМОВЫ уонна кини биир идэлээхтэрин утары олоҕо суох тэриллибит холуобунай дьыаланы   уталыппакка кырдьыктаахтык көрөрүгэр туруорсары модьуйуоххайыҥ.
2. Ханнык баҕарар демократическай уопсастыбаҕа курдук хас биирдии киһи быраабын араҥаччылыыр Российскай Федерация Конституцията, Сокуона тутуһуллан, ДЬИҤ КЫРДЬЫК суутунан дакаастанан  буруйдуур  бириигэбэр көтүрүллэригэр бука бары биир киһи курдук турунуоххайыҥ.

 

Хас биирдиибит көҥүлүн, быраабын харыстыыр, араҥаччылыыр туһугар биир санаалаах Саха сирин олохтоохторо биһиги ЫҤЫРЫЫБЫТЫН өйүөхтэрэ диэн эрэнэбит!