Үрүҥ көмүстээх сир  улуус киинэ Баатаҥай Алыытыттан 120 км тэйиччи сиргэ тайаан сытар. "Янгеология" акционернай тэрилтэ геологтара быһаарбыттарынан, Кимпииччэ "С1-С2" категориялаах 1200 тн үрүҥ көмүс  саппаастаах.

        Акционернай тэрилтэ салайааччыта Николай Тямисов Дьааҥы улууһун "Дьааҥы аартыга" хаһыакка: "Бу сиргэ булуллубут үрүҥ көмүс кээмэйэ төһө да дьоҕуһун иһин, Россияҕа эрэ буолбакка, бүтүн аан дойдуга суох баай   састааптаах буолан, бары экономическай көрдөрүүлэрэ сөп түбэһэр  элбэх барыһы киллэриэн сөп", -- диэн иһитиннэрдэ.

        Эһиил, саҥа аһыллыбыт үрүҥ көмүс хостонор сиригэр анал аукцион ыытыллыаҕа. Россияҕа сиртэн хостонор күндү металлы хостуон баҕалаах кыахтаах компания үгүс буолан, Кимпииччэ аукционугар кыайбыт тэрилтэ, лицензиятын ылаат, промышленнай үлэни саҕалаабытынан барыаҕа. Онон уонча сыл сыл устата үрүҥ көмүһү хостооһуҥҥа эбии үлэ миэстэтэ тахсан, олохтоох бюджекка нолуоктан ботуччу барыс киирэн, улуус социальнай-экономическэй сайдыытыгар дьоһуннаах хардыы оҥоһуллуоҕа. 

 

Елена ПОТОЦКАЯ.