Вице-спикер көмөлөһөөччүтэ суруналыыс Иван СЕРГИН санатарынан, күрэхтэһиигэ үрдүкү кылаас үөрэнээччилэрэ кытталлар. Өйтөн суруйуу, эссе, кыраайы үөрэтэр үлэлэр киирсэллэр.
“Оҕолор 1812 сыллаах Аҕа дойду сэриититтэн саҕалаан, республиканы төрүттэспит, туруоруспут улуу биир дойдулаахтарбыт - М.К.Аммосов, П.А.Ойуунускай, И.Н.Барахов, С.М.Аржаков, С.В.Васильев тустарынан суруйан куонкуруска киллэрдилэр. Ону сэргэ Саха сирэ автономнай республика буолбута 90 сылыгар анаан санааларын ыыттылар. Сиһилии иһитиннэриини Үөрэх министиэристибэтин сайтыгар, “Конкурсы, гранты” салааҕа киирэн ааҕыахха сөп www.sakha.gov.ru/minobr” – диэн Иван СЕРГИН ыйар.
***
Сэтинньи 21 күнүнээҕи туругунан, куонкуруска оруобуна лоп-бааччы 100 үлэ киирбит. Дьиктитэ диэн, элбэх үлэ 1812 сыллаах сэриигэ анаммыт. Бу темаҕа чахчылар аҕыйахтар диэн, бэл, учуонайдар бэлиэтииллэр. Ол гынан баран, манна научнай дакаастабыл элбэҕэ оруолу оонньообот, саамай кылаабынайа ааптар гражданскай позициятын көрдөрүүтэ учуоттанар диэн тэрийээччилэр этэллэр.
Кыайыылаахтары анал сүбэ мунньах быһаарыаҕа. Сүбэ мунньахха Үөрэх министиэристибэтиттэн, “Үөрэх тэрилтэлэрин попечителлэрин сүбэтин ассоссиациятын” правлениетыттан уонна “Точка опоры” гражданскай общество сайдыытын фондатыттан дьон киириэҕэ. Бэрэссэдээтэлинэн миниистир Афанасий Владимиров үлэлиэхтээх, оттон чилиэннэринэн «АЛРОСА» АК вице-президенэ Иван Демьянов, норуодунай суруйааччы Николай Лугинов, сэрии бэтэрээнэ Михаил Попов, Кыраайы үөрэтэр музей дириэктэрэ Егор Шишигин, история наукатын доктора Павел Казарян, ХИФУ ректора Евгения Михайлова о.д.а. түбүгүрүөхтэрэ.
Егор Шишигин «Саха» НКИК-ҕа соторутааҕыта интервью биэрэн турар, онно кини маннык куонкурустар ыччаты ийэ дойдуну ытыктыырга, таптыырга угуйаллар, сиэр-майгы өттүнэн үөрэтэллэр диэн эппитэ. “Ону сэргэ Егор Спиридонович ФС вице-спикерэ, “Точка опоры” фонда президенэ Вячеслав ШТЫРОВ ыччаты иитиигэ болҕомтотун уурарын бэлиэтээбитэ”, - диэн Иван СЕРГИН ахтар.
Куонкурус кыайыылаахтара алта номинациянан ааттаныахтара. Үс бастакылар Apple Macbook Air13, Apple Ipad New 4g 64Gb, Apple IPhone. 4S 16Gb бириистэри тутуохтара.