Быйылгы Москваҕа уонна Санкт-Петербурга "Саха сирин күннэригэр" өрөспүүбүлүкэ  «Саха-ЭКСПО» диэн улахан быыстапка-дьаарбаҥка былааннаан үлэлэтэр. Манна өрөспүүбүлүкэ суолун-ииһин хааччыйар тэрилтэлэр, таһаҕаһын таһааччылар үлэлэрин-хамнастарын көрдөрөллөр. Син суоллаах-иистээх, инфраструктуралаах дойдуга үптээх-астаах дьон кэлиэхтэрэ буолуо.
Быыстапка-дьаарбаҥкаҕа "ЛОРП" ААО, «Авиакомпания «Якутия» ААО, «Авиакомпания «Полярные авиалинии», «Аэропорт «Якутск» ААО,  «Железные дороги Якутии» ААО уонна  «Управление автомобильных дорог РС(Я)» ГКУ кытталлар. 

Ленатааҕы өрүс пароходствота Саха сирин өрүстэрин картатын, ханна, хаһан, төһө-хачча таһаҕас таһар кыахтаахтарын көрдөрүөхтэрэ. Ону сэргэ  тэрилтэ 16 сылга диэри сайдар былаанын билиһиннэриэҕэ. Өрүһү туоруур сүрүн муоста хаһан тутуллуоҕа биллибэт, сиринэн суол-иис куһаҕан, салгынынан ыарахан кэмнэригэр, чуолаан бу тэрилтэ эрэ Саха сирин таһаҕаһын, дьонун-сэргэтин таһан олордоҕо. Онон, хайдах да гыммыт иһин, пароходстволарга государство, кэтэх бас билии да өттүттэн улахан болҕомто эрэйиллэр.

Нина ШАДРИНА,
Аартык.ру.