Миниистир Андрей БОРИСОВ тэрээһиҥҥэ анаан, Нуучча академическэй драмтеатрын артыыстарын күүһүнэн  "Созвездие Марии" испиктээкили туруора сылдьара иһиллэр. Бу испиктээкил 25 сыл анараа өттүгэр  араадьыйаҕа туруоруллубутун бэлиэтиир тоҕоостоох, сыанаҕа аан бастаан дьүһүйүллүөхтээх. Ааптар  поэт Владимир ФЕДОРОВ. "Созвездие Марии" Москваҕа театральнай түһүмэҕи аһыахтаах.  

Оттон П.Ойуунускай аатынан Саха театра Өксөкүлээх "Ойуун түүлүн" туруорар диэн эттилэр. Туруорааччы режиссер - Руслан ТАРАХОВСКАЙ. Испиктээкили аатырбыт "ЧОЛБОН" бөлөх тыыннаах музыканан доҕуһуоллуохтаах. "Чолбоннор" этэллэринэн, тыас-уус үксэ Григорий ИЛЬИН айымньыларынан таҥылынна. Москваҕа уонна Питергэ Александр ИЛЬИН, Юрий ВАСИЛЬЕВ, Александр ИВАНОВ састааптаах "Чолбон" барыаҕа.

"Ойуун түүлүн" Өксөкүлээх бэйэтэ оонньоон көрдөрөрө диэн Амма Аччыгыйын ахтыытыгар баар. Улуу бөлүһүөк ойуун таҥаһын таҥнан баран көмүлүөк имик-самык уотун иннигэр дьүһүйүүтүн саҕалаатаҕына, тылын-хомуһунун күүһүнэн Добун Куйаар киҥкиниир киэҥ иэнигэр көрөөччүтүн кытары айанныыра диэн ахталлара үһү.

"Ойуун түүлүн"  Сэбиэскэй кэмҥэ Г.Местников туруора сылдьыбыта биллэр.

ТАРАХОВСКАЙ туруоруутугар алта артыыс кыттара иһиллэр, олор истэригэр Герасим ВАСИЛЬЕВ, Степанида БОРИСОВА, Иннокентий ДАКАЯРОВ. 

Эдэр режиссер Руслан ТАРАХОВСКАЙ  "Ойуун түүлэ" курдук эпохальнай айымньы сүрүн тыынын сөпкө аттаран көрөөччүгэ тиэрдиэ дуо диэн боппурос үөскүүр. Улуу айымньыга диэри өссө үүнүөххэ наада. Улахан эппиэттээх дьыаланы ылсыбыт уол туруоруута төһө табыллыбытын москвичтар кэннилэриттэн көрөө инибит.