Федот Тумусов быыбар кэнниттэн быыбардааччыларын кытары көрсүбэтэ, Гордумаҕа онтон буолуох айылаах үлэ элбэҕэ тартаҕа. Онон "сиэрдээхтэр" пресс-конференцияларын эдэр политик Никита ТИМОФЕЕВ ыытта.

ТИМОФЕЕВ тылыттан-өһүттэн иһиттэххэ, "сиэрдээхтэр" олус куһаҕаннык быыбары түмүктээбэтэхтэр. Инньэ гынан, 13 муниципальнай тэриллии баһылыгын "биһиэнэ" диэтилэр. Бу 13 киһиттэн 5 кандидат аһаҕастык партияттан быыбарга кыттыбыт, 8 киһи сир-буор аннынан өйөммүт. "Аһаҕастык партия аатыттан кыттыбыттара эбитэ буоллар, дьаһалта өттүттэн харсыыны көрсүө этилэр" диэн Никита ТИМОФЕЕВ этэр.

Быһаас кулун тутарга Дьокуускай куорат баһылыгар киирсибит Анатолий КЫРДЖАГАСОВ төттөрү "дьаһалта күүһүттэн көмүскэнээри "СР" партияттан өйөбүл көрдөөтүм" диэн эппиттээх. Оччотугар, билиҥҥи быыбарга партияттан араҕа сатыыр көстүү баар эбит.

Ньурба куорат баһылыгынан эсер Гаврил ВАСИЛЬЕВ 47 бырыһыаны ылла диэн улаханнык эттилэр. Ол гынан баран бу куоракка нэһилиэнньэ 19 бырыһыана эрэ (хаһан да буолбатах быһыы) куоластыы тахсыбыта. Дьон быыбарга сабатаастаан тахсыбата диэн ньурбалар билинэллэр. Муниципальнай тэриллии быыбарыгар баҕар кандидат бэйэтэ соҕотоҕун да куоластаатын - быыбар буолбут саҕа сыаналанар кэмэ. Аны, бюллетеҥҥэ "барыларын утарабын" диэн графа эмиэ суох. Онон сир да тал - хайыыр да кыах суох.

 Улуус баһылыга эсер Борис ПОПОВ салайааччы быһыытынан мөлтөҕүттэн ньурбалар астыммакка сылдьаллар. Сотору-сотору "таах Евсеевпытын талбаккабыт" диэн муҥатыйыылар иһиллэллэр. Санатар эбит буоллахха,  улуус баһылыгын быыбарыгар улуус  дьокутааттарын мунньаҕын спикерэ  "единорос" Сергей ЕВСЕЕВ кыттыбыта. ЕВСЕЕВ быыбар иннинээҕи хампаанньатын (политтехнологтар этэллэринэн - стратегиятын) сыыһа-халты ыытан быыбарга Борис ПОПОВКА кыайтаран хаалбыта. Дьон, урут улууска олорбут Владимир ПРОКОПЬЕВ (билигин "Центрлес" ГАУ салайааччыта) политикатын сөбүлээбэтэхтэрин суотугар, ЕВСЕЕВ "кини утумнааччытабын" диэн  этэн киирэн биэрэн "былдьаммыта". ПОПОВ чыҥха бырачыастыыр санааҕа эрэ олорсон күөрэс гынан быыбарга кыайбыта. Ньурбалар ол бырачыастарыттан билигин бэйэлэрэ кэһэйэн олордохторо. Үйэтин-сааһын  тухары биир хаһаайыстыба тэрилтэтин салайбатах, учуонай киһи улууһу дьаһайара олус ыараханын өйдүүбүт. Итиччэтигэр нэһилиэнньэ оннук айылаах баһылыгын астыммат буоллаҕына импичмент биллэриэн да сөп курдук.

***
Ньурбаны таһынан, "сиэрдээхтэр" Пеледуйга (Ленскэй), Эльдикаҥҥа (Уус Майа), Арыылаах сэлиэнньэтигэр (Үөһээ Халыма), Салбаҥҥа (Нам) кыайбыттар. Манна баһылыктарынан бу партия туруорбут кандидаттара кыайбыттар. 
Уопсайынан, Уус Майа улууһун "Сиэрдээх Арассыыйа" партиятын олохтоох салаата, кэнэҕэс быыбардарга  тирэх оҥостор былааннаах диэн атын күрэстэһэр партия "сибис" гынар. Бочуоттаах энергетик Константин ИЛЬКОВСКАЙ Ил Дархан дьороҕор бэргэһэтин кэтэр холонуутугар Уус Майа электората көмөлөһүөх кэриҥнээх үһү. Ильковскай кэнниттэн "Якутскэнерго" генеральнай дириэктэринэн үлэлиир "единорос" Олег ТАРАСОВ диэки таас тамнаныыта саҕаламмытын бэчээттэн көрүөххүтүн сөп.
***
Депутаттар мунньахтарыгар "Сиэрдээх Арассыыйа" туруорбут дьонуттан 60 киһи ааспыт, өйөөбүт дьонуттан 165 киһи. Барыта илбээн-холбоон  араас таһымҥа 225 депутаттаммыттар. Бу дьон спикергэ аны анньыһыахтаахтар. 
***
"Өлүөхүмэҕэ куһаҕаннык үлэлээтибит", - диэн ТИМОФЕЕВ билинэр. Манна куорат депутаттарын сүбэтигэр "сиэрдээхтэр" 6,11 бырыһыаны эрэ ылбыттар.  Бэл, коммунистартан уонна ЛДПРдартан даҕаны аҕыйах бырыһыаннаахтар. 
***
Түмүккэ - "Сиэрдээх Арассыыйа" Саха сиригэр барыта 300 депутаттаммыт (онтон сороҕо партийнай билиэтэ суох): 250 нэһилиэк мунньаҕар, 50 улууска. 20 баһылыктаахтар: 17 куорат, нэһилиэк, 3 - улуус баһылыктара.