Аллараа Бэстээх бөһүөлэгин баһылыгын быыбарыгар кыттан баран, официальнай докумуон быһыытынан 51 куолаһынан Георгий БОРГА хотторбут Родион ФЕДОРОВ: "Сууттаһабын!" - диэн суоһурҕана олорор. 

Мэҥэ Хаҥалас олохтоохторун быйыл икки төгүл икки аҥыы хайыттылар. Онуоха төрүөт буолла - БЫЫБАРДАР. Икки быыбар тухары Родион ФЕДОРОВ аата ааттанар. Тоҕо сүрэй дуу, тоҕо бэрдэй дуу...
ФЕДОРОВ улуус кулубатыгар быһаас Николай СТАРОСТИНЫ кытары күөн көрсөн эмиэ аҕыйах куолаһынан баһыйтарбыта. Санатар эбит буоллахха, инники кулубаҕа - Иннокентий ПТИЦЫҤҤА бастакы солбуйааччынан үлэлээбит СТАРОСТИНЫ өйөөн президент бэйэтинэн тахса сылдьыбыта. 

Оттон бэҕэһээ, алтынньы 18 күнүгэр, "Тыгын Дархан" конференс-саалатыгар Родион ФЕДОРОВ аны Аллараа Бэстээх баһылыгын быыбарын кэнниттэн суруналыыстардыын көрүстэ. Кини онно быыбарга үлэлээбит штабын үлэһиттэрин кытары  "суруйуо диэбит" суруналыыстарын ыҥыртаан пресс-конференция ыытта. Быыбарга хотторуу амтанын билбит дьон кэри-куру туттан, болдьоммут чаастара ааһан аныгыскытыгар үктэнэ сыһыар диэри, бэрт нэһиилэ  кэтэһиннэрэн-манаһыннаран муһуннулар. Маннык "суһал" штаб хайдах-хайдах быыбарга үлэлээбитэ буолла...

***

Родион Иннокентьевич уҥа илиитинэн Дьокуускай Думатын депутата, "сиэрдээх" Константин ФЕДОРОВ олордо, хаҥас илиитигэр "кытыастар кыһыл" хомуньуус Владимир Ю олордо.  "Аартык.ру" ИХ Родион ФЕДОРОВ Мэҥэ баһылыгын быыбарын кэнниттэн көрсөн кэпсэтэ сылдьыбыттаах. Онно кини "Единэй Россия" өссө "Отечество" эрдэҕинэ киирбитим, Саха сиригэр бу партия тэриллэригэр сүүрбүт-көппүт дьонтон биирдэстэрэбин диэн эппиттээх. Онон аныгы демократия үйэтигэр, үс партия бэрэстэбиитэлэ сэргэстэһэн  олорон суруналыыстар иннилэригэр  суҥхарбыт санааларын тоҕо-хоро тэбээтилэр.

***

Бастатан туран, юрист Владимир Ю быыбар күн учаастакка туох-ханнык кэһии тахсыбытын кэпсээтэ. 5№-дээх Быыбардыыр учаастак председателэ Афанасьева учаастагын хамыыһыйатыгар кэргэнин эмиэ киллэрбитин кэпсээтэ. Биллэн турар, быыбарга "дьиэ кэргэн бэдэрээтэ" бобуллар дьыала.
Быыбардыахтаах дьон испииһэгэ Ю этэринэн, иирбит аҕабыыт кумааҕытын санатар эбит. Дьиҥнээх хаһаайыттар испииһэккэ суохтар, ол оннугар кэлии араспаанньалаах дьон бааллар эбит. Ону таһынан, былыр үйэҕэ көһөн барбыт дьон, пааспардарын дааннайдара эмиэ "быыбардаабыттар". 
Родион Иннокентьевич этэринэн, испииһэк эрдэ бэрэбиэркэлэммэтэх, саҥардыллыбатах. Быыбардыыр учаастак киэһээ 20.00 чааска сабыллан баран, түүн үөһгэр эрэ бюллетеннэри ааҕыы саҕаламмыт. Онуоха диэри көннөрүү, үрдүнэн суруйуу, бэрээдэктээһин барбыт. Ю "үҥсүөм" диэн председатель Афанасьеваны сэрэтэ сатаабыт даҕаны, анарааҥҥыта "ханна да үҥүс" диэн аахайбатах. 
***
Суруналыыстар ФЕДОРОВ штаба тоҕо эрдэ испииһэги ылан бэрэбиэркэлээбэтэҕин туоһуласта. Ону Родион Иннокентьевич быыбар кэнниттэн биирдэ тэҥниир кини штабын тактиката этэ диэн этэр. Хайдах эрэ саарбах соҕус "тактика" диэтэҕиҥ, хайыаххыный хаһаайын тактикатын бэйэтэ быһаарар буоллаҕа.
Ити туох баар кэһиини барытын түмэн туран, ФЕДОРОВ сууттаһыам диир. Ол гынан баран, хотторбут дьон сууттаһан биирдэ да быыбар түмүгүн уларыта иликтэр. Арай, хас да сыллааҕыта Сунтаар сэлиэнньэтин баһылыгын быыбарын түмүгүн "сиэрдээхтэр" көтүттэрэ сатаабыттара. Бастакы суукка кыайан баран, кэлин син биир хотторбуттара. Былааска ураҕастаныы - халлааҥҥа ураҕастаныы кэриэтэ. Ким эмэ кыайбыт сураҕа иһиллибэт. Ол гынан баран Родион ФЕДОРОВ санаатын түһэрбэт. Биир эмэ холобур баар буолуохтаах" диир. Сотору быыбардар бөҕөтө саҕаланыахтара, онно сокуону кэһии тахсыбатын курдук "холобур" наада диэн ФЕДОРОВ санаалаах. 
***
Родион ФЕДОРОВ былаас партиятын чилиэнэ киһи, ситэриилээх былааска талаһар даҕаны кыайан ыттыбат төрүөтүн биири эрэ кытары сибээстиэххэ сөп - Егор БОРИСОВ күлүгүн быһа хаампыт буолуон сөп. Оттон БОР үөһэттэн өйөбүлэ суох хайдах даҕаны билбитинэн быыбар түмүгүн айбардыыр кыаҕа суох.
ФЕДОРОВ Мэҥэ Хаҥаласка общественнай сүбэ тэрийэр былааннаах. Ил Түмэн быыбарыгар киирсэҕин ду диэн ыйытыыга, "бастаан бу быыбарбын кытары быһаарсыам, кэлин көстүө" диэн эттэ. 

Туйаара НУТЧИНА, 
Аартык.ру