Дьону соһутар, уолутар майгылаах  Юрий ГОРОДЕЦКАЙ бу чэппиэргэ тахсыбыт "Жизнь Якутска" хаһыатын тираһын бүтүннүү атыылаһан ылбыттар. Тираж барбыта үчүгэй эрээри, барытын биир киһи атыыласпыта туһугар - айдаан. 

Биир идэлээхтэрбит сэһэргээбиттэринэн, хаһыаты өссө типографияттан быһа ылаары соруммуттар. Ол эрээри, хаһыаты бэчээттиир "Наше время" Издательскай Дьиэ маны утарбыт. Ол иһин киоскаларга киирбитин кэннэ, биир массыына кэрийэ сылдьан туох баар тираһы барытын хомуйан ылбыт. Санатар эбит буоллахха,  ГОРОДЕЦКАЙ "Наше время" типографиятыгар икки хаһыаты бэчээттэтэр: "Криминальная Якутия" (оптуорунньукка тахсар) уонна "Жизнь Якутска" (чэппиэргэ тахсар). 

Хаһыат тираһын ааҕааччыга тиэрдибэккэ эрэ кууһунан атыылаһан ылбыт дьон - ГОРОДЕЦКАЙ сүгүрүйээччилэрэ буолбатахтара сэрэйиллэр. Маннык балаһыанньаҕа хаһыакка тахсыахтаах ыстатыйа киэҥ ааҕааччыга тарҕанарын бопсуу буолар. Дьиҥинэн, интернеккэ "ол кутталлаах" сонун тахсыбыта ыраатта. Судьуйалар (биирэ астаапкаҕа тахсыбыт, БГУЭП преподавателэ) икки обургу кылаас кыргыттарын "соччото суох туруктаах" массыына ыыта сылдьан Лермонтов-Петровскай уулуссалар быһа охсуһууларыгар түҥнэри көппүттэрэ биллэр.
***  

Хаһан эрэ, былырыын баччаларга этэ дуу,  "Туймаада уоттара" хаһыат ааҕааччыга тиийбэккэ эмиэ биир-икки чаас иһинэн атыыламмыт сураҕын истибиппит. Хаһыат чыпчылыйыах иннинэ түргэнник атыыламмыт төрүөтүнэн - "таптал" тиэмэтэ буолбуттааҕа. Онуоха "Туймаада" редактора Александр ЯКОВЛЕВ ааҕааччыга тиийбэтэх нүөмэрин хаттаан элбэтэн бэчээттээн редакциятыгар барыс киллэринэн турардаах.  Юра ГОРОДЕЦКАЙ даҕаны оннук дьаһаныан сөп буоллаҕа эбээт.