Бастатан туран, бюджет суотуттан хамнастанан олорор дьон хамнаһа үрдүөхтээх. Олох алын кээмэйиттэн кыра хамнас диэн республикаҕа  суох буолуохтаах.  2013 сылга хамнас фондата  58 млрд солкуобайга тиийиэхтээх (2012 сылга ити 8 млрд аҕыйах этэ). Хамнас араастаһыыта аччыахтаах. Иккиһинэн, дьоҕус уонна орто предпринимательствоны өйүүр СР Солуогун фондатын үбэ 2 млрд солк. диэри элбиэхтээх, 2014 сылга 4 млрд диэри хаҥыахтаах. Дьоҕус уонна орто предпринимательство нолуога судургутуйуохтаах. 

Үсүһүнэн, тыа сиригэр олох-дьаһах усулуобуйата тупсуохтаах - инженернэй хааччыллыы, уу, уот, гаас, ититии киириэхтээх, суол тупсарыллыахтаах. Дьон тыаҕа олохсуйарга дьулуһарын ситиһиллиэхтээх.

Төрдүһүнэн, олорор дьиэ тутуллара элбиэхтээх (ордук тыаҕа). Албыннаппыт дольщиктары, биэс оҕолоох ыаллары, үс игирэлэммит дьиэ кэргэни, тулаайах оҕолору, бюджет үлэһиттэрин о.д.а. өйүөхтэрэ.  Сэрии бэтэрээннэрэ бары дьиэлэниэхтээхтэр. Социальнай дьиэ, пилотнай проект салҕаныахтаах.  2011-2012 сс. тутууга көрүллүбүт үп  2,7 - 3 млрд тиийбитэ. 318 000 кв. м - 350 000 кв. м диэри дьиэ киирэр иэнэ улааппыта. 2013 сылга 400 000 кв. м киириэхтээх, ол иһигэр 170 000 кв. м кэтэх дьиэ.

Бэсиһинэн, доруобуйа харыстабылын сайыннарарга быйыл 4,7 млрд солкуобай көрүллүбүтэ. Эһиил үп киинтэн кэлбэт, онон республика бэйэтин кыаҕынан салгыы ити программаны үлэлэтиэхтээх. Онкология, кардиология уонна  и наркология кииннэрэ тутуллуохтаахтар. Ыраах сытар улуустарга олорор дьон доруобуйаларын чинчийии ыытыллыахтаах.

Алтыһынан, оскуолалар, детсадтар салгыы тутуллуохтара.  100 детсад тутуллара былааннанар. Кэтэх детсадтары өйүөххэ наада. 

Хас биирдии дьоҥҥо ханнык эмэ социальнай көмө син биир оҥоһуллуохтаах: кыамматтары булан чуо көмөлөһөргө, үлэлииллэри социальнай контракка (ол иһигэр кэтэх хаһаайыстыбаны тэринэригэр) көһөрүөххэ наада. 

Инбэлиит оҕолору реабилитациялыыр киин проегын оҥотторуохха наада. 2014 сылга тутуллуохтаах.

Сэттиһинэн, республикаҕа  инвестиция киириэхтээх. "Якутия" диэн венчурнай хампаанньа тэрилиннэ. ХИФУ иһинэн Интеллектульнай бас билии киинэ Эргиэн-промышленнай палатаны кытары ыкса үлэлиэхтээх. 

Экономиканы сайыннарар саҥа технология, наука ситиһиитэ олоххо киирэригэр  государство уонна бизнес кыттыһыахтаах.

Президент ону сэргэ федеральнай киини кытары ыкса үлэлэһэргэ ыҥырда.

Аартык.ру