Бастатан туран, Ньурба куорат мээригэр Гаврил ВАСИЛЬЕВ кыайда. Ньурба улууһун баһылыга Борис ПОПОВ эмиэ "справорос" буоларын санатар тоҕоостоох, онон "бэйэ киһитин" өйүүрэ эрдэттэн сэрэйиллэр дьыала этэ. Уопсайынан, Ньурбатааҕы быыбар олус айдааннаахтык ааста. ПОПОВ бастаан аймаҕын В.УГАПЬЕВЫ туруоран испитэ, хата киһитэ сууттана сылдьыбыта прессаҕа биллэн, быыбар иннинээҕи  биэтэктэн туораабыта.

 Ньурба Бордоҥор (Маалыкай) ПОПОВ өйөөбүт киһитэ - Любомир МИХАЙЛОВ кыайтарда, ол оннугар бэйэтэ туруоруммут Аркадий НИКОЛАЕВ биир куолаһынан оскуола учууталын Наталья ПЕТРОВАНЫ  кыайан баһылык буолла.
Манан диэн эттэххэ, быһаас талыллыбыт улуус кулубата Борис ПОПОВ үлэтин-хамнаһын нэһилиэнньэ улаханнык астыммакка сылдьар.  Октябрьскай нэһилиэк (Антоновка) баһылыгынан икки сыл субуруччу үлэлээбит Алексей ИННОКЕНТЬЕВЫ олохтоохтор үһүстээн быыбарга туруораары соруммуттарыгар, ПОПОВ кэлэн "боппут". Тоҕо диэтэххэ,  улуус баһылыгын быыбарыгар кинини утары үлэлээн ат тарпат айыытын таһаарбыт... Каадыр боппуруоһугар "эн-мин" диэн аттааннаһартан, иэс баайсартан нэһилиэнньэ эрэ кэһэйэрин сорох-сорох салайааччылар өйдөөбөттөрө олус хомолтолоох.   

 "Тумууһаптар" хоту Үөһээ Халыма улууһун Арыылаах нэһилиэгэр кыайдылар. Онно баһылыгынан Анатолий СЛЕПЦОВ талылынна.    Пеледуйга, Уус Майа Эльдиканыгар, Нам Салбаҥыгар "сиэрдээхтэр"  этэрээттэрэ хаҥаата. Сөдүөт Сэмэнэбис бэйэтэ быыбар иннинэ эппитинэн, "сиэрдээхтэр" баһылыкка буолбакка, улуус дьокутааттарын мунньаҕар спикердэргэ интэриэстээхтэр. Спикери ыллахтарына - Ил Түмэн быыбарын, салгыы Ил Дархан быыбарын ылбыт саҕа саҕаланаллара чуолкай.
*** 
Коммунистар барахсаттар биир эрэ быыбарга кыайдылар. Михаил ДОНСКОЙДАРА Тумууһап төрөөбүт улууһугар - Үөһээ Бүлүү Үөдэйигэр хотто.
"Единоростар" 200-чэкэ нэһилиэктэри аахпатахха, Покровскайы, Нерюнгрины, Орто Халыма, Өлүөхүмэ, Ленскэй куораттарын ыллылар. Мииринэйгэ уонна Удачнайга бэйэлэрэ туруоруммут кандидаттар кыайдылар: Александр БАСЫРОВ уонна Артур ПРИХОДЬКО. 
Мэҥэ Хаҥалас киинигэр Майаҕа Тимофей НЕСТЕРОВ (ЕР) кыайда. Оттон айдааннаах-араллааннаах Аллараа Бэстээх быыбарыгар Георгий БОР хаһыс эмэ төгүлүн талылынна. Аата-ахсаана суох кэлии омукка сири бордук түҥэппит БОР обургу Родион ФЕДОРОВЫ "өттүгүн таһынан" киэр элиттэ. ФЕДОРОВ быһаас Николай СТАРОСТИНЫ кытары улуус кулубатын быыбарыгар кыттан эмиэ хотторбута. Ол абаккатын толуйаары Бэстээххэ киирдэҕэ. Бэстээх элбэх омук олорор бөһүөлэгэ, улуус критерийинэн ылан быыбар хампаанньатын ыытыы сыыһата көстөн таҕыста.   
***
Быыбар бүттэ. Күннээҕи олох саҕаланыахтаах. Билигин нэһилиэктэргэ, үгэс курдук быыбар кэнниттэн,  аймахтарынан хайдыһыы, урууларынан урусхаллаһыы тахсыбытын көрбүттээҕэр сэрэйбит ордук. Куорат, бөһүөлэк мээрдэрэ ким быыбарга кими утары үлэлээбитин аахсыһыыта барыахтаах. Кыра-хара норуоту баҕас, дьэ, ыһар быыбардар диэтэҕиҥ.

Туйаара НУТЧИНА,
Аартык.ру.