АММОСОВ Дьокуускайга урут "Медуза" диэн казинолааҕа, ырыынактааҕа (кэлин "Столичнай" диэн ааттаммыта). "Якутцемент" ААО-тун быйыл Владивосток мээригэр атыылаан баран, барыһыттан төрөөбүт республикатыгар 40 оҕо площадкатын тутан бэлэхтээбитэ. Билэр дьон кэпсииринэн, киин куорат  Култуура уонна сынньалаҥ пааркатыгар эмиэ  тэрилтэлээх. Ону таһынан АММОСОВ биир актива Белоруссияҕа собуот быһыытынан үлэлии турара эмиэ биллэр. 
***
Александр АММОСОВ уонна Карл ВАСИЛЬЕВ (Ил Түмэн депутата, «Комитет по драгоценным металлам и драгоценным камням Республики Саха (Якутия)" ГУТ салайааччыта) иккиэн бииргэ төрөөбүт аҕыс-балыстыылар оҕолоро. "Комдрагмет" ГУТ  Дьокуускайдааҕы государственнай тыа хаһаайыстыбатын академиятын аттыгар "Олонхо" диэн ресторан аспыта, рестораны самалык эмиэ ыччаты "аралдьытар" "Парадокс" кулууптаах. Аймахтыы дьон ыччат суотугар сиэптэрин хаҥаталлара хайдах эбитэ буолла...
Манан диэн эттэххэ, "Комдрагмет" "Старый город", "Третья Линия",  "Вернисаж",  "Кружало", "Индигирка",  Pizza Land рестораннардааҕа, кафелардааҕа биллэр. "Комдрагмет" государственнай тэрилтэ. Карл ВАСИЛЬЕВ Ил Түмэн депутата. Депутат уонна государственнай тэрилтэ салайааччыта республика президенэ арыгыны утары ыытар хампаанньатын, чөл олоҕу пропагандалыыр политикатын  утарар буолан тахсарыгар тиийэр.
Сорох дьон АММОСОВ 90-с сылларга ханнык үпкэ бизнесмен буола түспүтүн ырыталлар. Онно АММОСОВ кэргэнин аҕатын (аҕа кынна республика профсоюһун председателя этэ) харчытын эргитэн, Москваҕа Рублево-Успенское шоссетыгар сир ылан баран ону атыылаан хаппытаал оҥостубута дииллэр. Сорохтор АММОСОВ "Рублевканы Рублевка оҥорбут дьонтон биирдэстэрэ" диэн киэн тутталлар.
*** 

"Дракон" - түүҥҥү Дьокуускай сиэркилэтээҕи күлүгэ буолан хас да эдэр ыччат олоҕун огдолутта. Тиһэх иэдээн букатын даҕаны дьону улаханнык аймаата. Ким эрэ мистикаҕа охтон, урукку күөлү куурдан тутуллубут түөлбэ олоҕо-дьаһаҕа барыта огдолуйан эрэрин түүйэр. Кырдьык, кырдьаҕастар этэллэринэн итиннэ урут күөл баара үһү. Уолбут уу билигин итиннэ тутуллан турар дьиэлэргэ сыырас түүнүгэ буолан "эргиллэ" турарын кэпсииллэр. Дьиҥинэн, иэдээн иэнигийиитэ арыгы буоларын бары да билэбит. Саха хаана арыгыны ылыммата науканан дакаастаммыт  чахчы. Аныгы сиэр-майгы сатарыйбыт үйэтигэр ыччат муста түстэ да пиибэлээн, буоккалаан барара мэлдьэҕэ суох. Ону тэбиэһирдэн биэрэр түүҥҥү кулууптар, ийэ-аҕа хараҕын уутун харчыга кубулутан ыган ылаллар.

Тиһэх сырыыга суорума суолламмыт уол сордоох, республикаҕа биллэр, күүстээх айылгылаах ойуун Владимир ЯДРЕЕВ уола диэн этэллэр. Онон, арааһа, иэһэ-күүһэ, толуга кытаанах буоларын сэрэйиэххэ сөп.  

Аартык.ру