Республика үрдүкү былааһыгар чугас киһи этэринэн, бу сайыҥҥыттан саҕалаан Валерий ЖОНДОРОВ министиэристибэтигэр силиэстийэлиир уоргаттар сыбыытаабыттар. Миниистир солбуйааччыта Павел БАГЫНАНОВ үбү-харчыны тыырыыга сыыһа-халты таһаарбытын ыраас мууска таһаарар соруктаах бэрэбиэркэһиттэр күнүстэри-түүннэри үлэлии сылдьалларын туһунан этэр. 

Павел БАГЫНАНОВ 1979 сыллаах төрүөх, сарсын, алтынньы 13 күнүгэр оруобуна 33 сааһын туолуохтаах. Миниистир солбуйааччытынан 2010 сыл ыам ыйын 5 күнүгэр президент Егор БОРИСОВ уурааҕынан анаммыта.
Эдэр киһи Дьокуускайга төрөөбүт, 1999 сыллаахха Дьокуускайдааҕы үп-экономика колледжын бүтэрбит. Онтон  РФ ҮМ Казначействотын управлениетыгар 2-с категориялаах  специалиһынан үлэлии киирбит.  2002 сыллаахха үөрэҕин үрдэтиммит. 2003 сыллаахха   «ЖКХ РС(Я)» ГУТ отделын начальнигынан ананан үлэлии сылдьан баран Казначействотыгар төннүбүт.

Онно баран 2006 сыллаахха орускуот кылаабынай казначейынан ананар, 2007 сыл тохсунньутугар бюджет туоларын касса нөҥүө ыытар өҥө отделын начальнига буолар. Ол кэнниттэн, үс сыл ааһаат, 2010 сыллаахха СР Үбүн миниистирин солбуйааччытынан ананар. Оччолорго үп миниистиринэн Вадим НОВИКОВ олорбута. НОВИКОВ 2007 сылтан 2012 сылга диэри миниистирдээбитэ. Кини кэнниттэн үбү дьаһайааччынан олунньу 22 күнүттэн Валерий ЖОНДОРОВ үлэлиир.

Вадим НОВИКОВ билигин Саха республикатын нэһилиэнньэтин олоҕун-дьаһаҕын хааччыйар государственнай кэмитиэт салайааччыта. 

Маннык соһуччу сонуну кэпсээбит киһи этэринэн, 2010 сыллаахтан  министиэристибэҕэ үлэлээбит дьону барытын (ол иһигэр Вадим НОВИКОВЫ) силиэстийэҕэ көрдөрүү биэрэллэригэр күһэйэ сылдьаллар эбит. "Бэл, "хара" үлэһиттэртэн кытары көрдөрүү ылаллар", - диэн этэр.

Павел БАГЫНАНОВ, үп миниистирин солбуйааччытын быһыытынан, бюджет туолара казначействонан ааһарын барытын хонтуруоллуур  боломуочуйалаах, ону сэргэ үп-харчы хамсыыр отчуотун, аныгы технология киирэрин иһин эппиэттиир үлэлээх. 

Өскөтүн силиэдэбэтэллэр бюджет үбүн ыскайдааһын тахсыбытын туоһулуур докумуоннары булан холуобунай дьыала тэрилиннэҕинэ, улахан айдаан тахсара сабаҕаланар. Оччолорго миниистирдээн олорбут Вадим НОВИКОВ даҕаны дьыалаҕа быһаччы эриллиэҕин сэрэйиэххэ сөп.