Бюджет дохуоттаах өттө 7,49 миллиард солкуобайынан улаатан, 123,6 миллиард солкуобайга тиийбит. Ордук элбэх үп нолуок дохуотун быһыытынан (3,8 миллиард солкуобай) уонна ирдэбилэ суох киирэр үп быһыытынан (3,3 миллиард солкуобай) эбиллэр.

Республика бюджетын ороскуоттаах өттө 7,86 миллиард солкуобайынан улаатан, 134,58 миллиард солкуобай буолла. 2012 сылга эбии киирбит үп бюджет үлэһиттэрин хамнастарын фондатын улаатыннарыыга (1,56 миллиард солкуобай), сүөһү аһылыгын бэлэмнээһиҥҥэ (350 мөлүйүөн солкуобай), халаан содулун туоратыыга (713 мөлүйүөн солкуобай) онтон да атын хайысхаларга ыытыллыахтаах.  

  Саха сирэ 2012 сыллааҕы государственнай бюджетын дефицитэ 369 мөлүйүөн солкуобайынан улаатта уонна 10,96 миллиард солкуобай буолла. Республика государственнай иэһэ 21,5 миллиард солкуобай буолбут.

  Ольга Федорова этэринэн, парламентарийдар бюджеккэ 3 миллиард солкуобайдаах 75 көннөрүүлэри киллэрбиттэр. Ол гынан баран  депутаттартан уонна правительство чилиэннэриттэн турар сөбүлэһиилээх хамыыһыйа баара-суоҕа 18 көннөрүүнү эрэ ылыммыт. Сорох программалар үбүлээһиннэрэ туолбатах. Ол иһигэр:  государственнай тыл, быраабы кэһиини сэрэтии, таһаҕаһы таһыы, кадрдары сайыннарыы, гражданскай көмүскэл программалара.

Федорова этэринэн сорох программалар үбүлээһиннэрэ элбээбит, ол гынан баран онтон көдьүүһэ тэбэн тахсыаҕар депутат бэркэ саарбахтыыр.  Холобур,  гаастааһыҥҥа үбүлээһин 30%, урбааҥҥа 9% улааппыт, “бу эффектээх буолууга хайдах да дьайбат», - диир Ольга Федорова.

  Дьүүллэһии түмүгэр депутаттар сокуон барылын бүтэһиктээх ааҕыыга ылыннылар. Эмиэ бүтэһик ааҕыыга Саха Республикатын булгуччулаах медицинскэй страховкалааһын Территориятааҕы фондатын бюджетыгар көннөрүүлэр ылыннылар диэн Ил Түмэн пресс-сулууспата этэр.