Ректор быыбарыгар академияттан үс киһи кытынна. 62 киһи куоластаабыттарын түмүгэр 49 куолаһы Леонид ВЛАДИМИРОВ ылан эрэллээхтик кыайда уонна кэлэр биэс сылга ректорынан салгыы үлэлии хаалла.
ВЛАДИМИРОВ академияны төрүттэспит киһи буолар. Кини салайбыт 15 сылыгар ДьГТХА дьиэлэнэн-уоттанан, уопсайданан, спортивнай комплекстанан, профилакторийданан кэллэ. Ону таһынан, куорат  ат сүүрдэр ипподромун көрөн-харайан олорор. Дьокуускайга соҕотох тенниснай корту үлэлэтэр.  
Тыа хаһаайыстыбатын үрдүк үөрэхтээх специалистарынан хааччыйар   соҕотох үөрэх кыһата, киин куораппыт кэрэ көстүүлээх муннугар кубулуйда. Саамай эрдэ Саҥа дьыллааҕы харыйа академия тэлгэһэтигэр туруоруллар үгэстээх, оттон сайынын сиэдэрэй сибэкки дьэрэкээнэ эмиэ ДьГТХА-гар булан көрүөххэ сөп. Үөрэҕи таһынан, устудьуоннар республикаҕа ыытыллар бары культурнай, спортивнай, общественнай  тэрээһиннэргэ барытыгар көхтөөхтүк кытталлар.
Ханнык баҕарар тэрилтэ салайааччытыттан улахан тутулуктаах. Онон Леонид ВЛАДИМИРОВ академияны 15 сыл иһигэр Саха сирин биир сүрүн үөрэх кыһатыгар кубулуппута кини салайааччы быһыытынан сатабыллааҕын, кыахтааҕын туоһулуур.