Саха республикатын сокуону оҥорор былааһын үрдүкү хаттаҕаһыгар араас быһылаан бары тахса сылдьыбыта. Аныгы историяны ылан көрөр эбит буоллахха, Ил Түмэн 20 сыллаах  историятыгар үс депутат холуобунай дьыалаҕа тардыллан хаайыыга киирбитэ. Бастатан туран, "Виктория" миэбэл салонун хаһаайына, Дьокуускай Сайсарытыттан депутат - Владимир ФЕДОРОВ дьону саанан ытыалаан дьиэ хаайыытыгар уурулла сылдьыбыта. Парламент спикерэ Николай СОЛОМОВ кэргэнин суорума суоллаан Табаҕа хаайыытыгар олорбута. Уонна бу былырыын ахсынньыга Афанасий МАКСИМОВ  "экономическэй буруйу оҥордо" диэн ааттаан 7 сылга күлүүс хаайыытыгар уураахтаммыта.
Икки инники депутат буруйугар эмсэҕэлээбит дьон илэ баар буоллахтарына, МАКСИМОВ дьыалатыгар "итээтим" диэн ытаабыт-соҥообут дьон да, тэрилтэ да суох. Ол иһин бу дьыала дьон-сэргэ өйүн-санаатын билигин даҕаны улаханнык өрүкүтэр. Мантан сылтаан урукку президент Вячеслав ШТЫРОВ аата улаханнык түстэ. 
Соторутааҕыта, интернет хаһыаттарга "Афанасий МАКСИМОВ депутаттыыр полномочиятын болдьоҕун иннинэ быһарга" соруналлар диэн таҕыста.  "Аартык.ру" онон сибээстээн  Ил Түмэн хас да депутатын кытары кэпсэтэ сырытта. Кинилэр этэллэринэн, сир-буор аннынан итинник сурах тарҕаммыта ырааппыт. Өссө ааспыт сыллааҕы сессияҕа спикер Виталий БАСЫГЫСОВ тыл көтөҕөн көрүллэн иһэн, депутаттар муос-таас курдук утарбыттарыттан сылтаан  МАКСИМОВ депутаттыыр полномочията уһуллубатах. Онуоха утарсыыны көҕүлээбит депутаттарга БАСЫГЫСОВ таала күүскэ кырыылана сылдьыбыт.  
"Билигин ити тиэмэни СОРУЙАН күөртээн эрэллэр, ол гынан баран күһүҥҥү сессияҕа полномочияны устуу боппуруоһа суох", - диэн депутаттар этэллэр.