Эрэйи-буруйу көрбүт куорат хаһыата - "Эхо столицы" дьэ кылаабынай редакторданан эрэр быһыыта. Мээр Айсен НИКОЛАЕВ "булгуччу нуучча редактора" наада диэбитин инниттэн, нуучча суруналыыһын көрдүү сатаан атахтара тосто сыһан баран син булбуттар - Александр ПРОКОПЬЕВЫ.

Саня хас да сыллааҕыта массыына саахалыгар түбэһэн сиһин улаханнык эчэтэн билигин кэлээскэҕэ олорор. Инбэлииттэр "Доступная среда" диэн обшественнай хамсааһыннарын көхтөөх чилиэнэ, спорт туһунан сөбүлээн суруйар. Бэл, "Азия оҕолоро" спортивнай оонньуу туһунан Путиҥҥа тиийэ боппуруос биэрбиттээҕэ. 

Прокопьев "Наше время", "Молодежь Якутии", "Спорт Якутии" хаһыаттарга, "Якутия24" Сонун агентствотыгар үлэлии сылдьыбыта. Коллегабытыгар саҥа үлэтигэр ситиһиини баҕарыаҕыҥ. 

Оттон "Эхо столицы" урукку редакторын солбуйааччы Ирина МАРТЫНОВА уонна корреспондент Сардаана СИВЦЕВА-САНААЙА уонча сыл үлэлээбит редакцияларыттан атын үлэҕэ барбыттар. Талааннаах суруналыыс кыргыттар ханнык саҥа бырайыакка барбыттарын улаханнык эппэттэр, "сотору истиэххит" диэн эрэннэрэллэр.

Олох -  хамсааһын, уларыйбат олох - улугурууга тиэрдэр. Онон уларыйыы хаһан баҕарар наада, сайдыы сүрүн бэлиэтэ буоллаҕа. 

ААРТЫК.ру