Тыаттан понедельникка киирээт да тута Москвалыахтаах дииллэр. Биллэн турар, итини трибунаттан эппэтилэр эрээри, үгүс дьон миитиҥҥэ "Тумууһабы" суохтаабыттарыгар харда курдук суруйдубут.
Дьадаҥы ахсаана элбиир, сыана үрдүүр. Ол быыһыгар ВТОҕа киирэбит диэн сүпсүлгэннирэллэр. Олох-дьаһах коммунальнай хаһаайыстыбатын тарыыба  25 бырыһыан үрдээбит.
Биир Елена ПАВЛОВА диэн саастаах дьахтар тахсан тыл эттэ. "Артур Алексеевы даҕаны, Василий Власовы даҕаны - иккиэннэрин олус сөбүлүүбүн, үчүгэй уолаттар, хайаларын таларбын кыайан быһаарбаппын", - диэн баран уҥа илиитигэр "кытаран" турар коммунистары, хаҥас өттүгэр "саһаран" турар "сиэрдээхтэри" мулук-халык көрөттүүр. Онтон дьахтар Чернышевскай уулуссаҕа "баанньык таһыгар кирпииччэ дьиэҕэ" олорорун эттэ. Бэйэтэ идэтинэн бухгалтер эбит. Дьиэлэрин "Прометей" Салайар Хампаанньа көрөр-истэр эбит. Соторутааҕыта коммунальнай төлөбүргэ перерасчет оҥоһуллубут, онуоха Гордума дьокутаата Григорий САЛЬВА "Прометей"  тэрилтэтэ олохтоохтору 100-түү тыһыынчаҕа тиийэ балыйа олорбута көстүбүт. Павлова бу туһунан сүрдээҕин абаккаран туран эттэ-тыынна. 
Биллэн турар, наар миитинниир-барыачыстыыр кыһыл-араҕас былаахтаах дьону сиилиэххэ сөп. Буолаары буолан алтынньытааҕы быыбарга "өҥнөрүн-түүлэрин" бар дьоҥҥо көрдөрүөхтэрин наада. Ол гынан баран, кырдьык, сыанабыт сиэри таһынан үрдүү турара киһини харааһыннарар. Элбэх хамнастаах дьоҥҥо ол улахан буолбата буолуо эрээри, нэһилиэнньэ улахан араҥата хамнастан хамнаска диэри бэрт нэһиилэ тиийинэн-түгэнэн олорор.  19 бырыһыан дьон букатын даҕаны кумалааннар ахсааннарыгар киирбиттэрэ ыраатта.  
Миитиннээччилэр куорат баһылыгар сурук суруйуох, этии киллэриэх буоллулар. Түмүгэ хайдах буолуоҕай?

Аартык.ру.