Илья МИХАЛЬЧУК Дьокуускай куорат дьаһалтатын салайааччытынан үлэлээбит сылларыгар таҥыллыбыт "гвардия" биир бэрэстэбиитэлэ Игорь ТРЕСКОВ Москваҕа көһөн барарынан, бииргэ үлэлээбит коллегаларын, билэр дьонун, доҕотторун кытары нэдиэлэ устатын тухары быраһаайдаста.

Тресков куорат салалтатыгар 1998 сыллаахха кэлбитэ. Быраап управлениетынсолбуйар начальнигыттан баһылык солбуйааччытыгар тиийэ үүммүтэ. Кини куорат дьаһалтатыгар кэлиэн  иннинэ түөрт сыл, оччотооҕу мээр - Спартак БОРИСОВ кэргэнэ салайар "Якутия" коммерческэй бааныгар юристконсультааннаабыта.

Игорь ТРЕСКОВ "Мээрийэ дьыалатыгар" куота көтөн эриллибэтэҕэ. Итинтэн да кини юрист быһыытынан тугун-ханныгын сабаҕалыахпытын сөп.

***

Айдааннаах холуобунай дьыала Михальчук "гвардеецтарын" барыларын кэриэтэ кими эрэ кыратык, кими эрэ биллэрдик хаарыйан ааспыттааҕа. Холобур, Николай ЛЕПЧИКОВ мээр бастакы солбуйааччытынан үлэлии сылдьыбытын "содулугар", мээрийэттэн уурайдар да, туоһу быһыытынан холуобунай дьыалаҕа көрдөрүү биэрбитэ. Николай Васильевич билигин "Водоканал" салайааччытын сүбэһитинэн үлэлиир.

Биир вице-мээр Валерий ПОПОВ хааһына 3 мөлүйүөнүн ыскайдааһыҥҥа буруйданан 2006 сыллаахха өссө СИЗОҕа кытары угулла сылдьыбыта. Онтон  сыр-мыр холуобунай дьыала уоҕа убаан, Попов харчыны сиэбитэ ырааппыта бэрт буолан (2002 сыллааҕы аньыы-хара этэ) уонна "буруйун билиннэ" диэн дьыала тохтотуллар. Попов ол кэнниттэн Дьокуускайтан Москваҕа көспүт диэн буолбута, өссө Москва Киин уокуругун префектуратыгар үлэҕэ киирбит диэн кэпсээн тарҕаммыта.

Михальчук аппараатын салайбыт Евгений ФЕДОРОВ "Мээрийэ дьыалатыгар" син балайда хабардык хабылла сылдьыбыта. Жанна МИХАЛЬЧУК кредит ылан баран  4 мөлүйүөнү чуолаан Федоров аатыгар көһөрбүтэ көстөн следователлэр үлэлэрин элбэппиттээх. Ол да буоллар, Евгений Николаевич онтон олус тэмтэрийбэтэҕэ, мээрийэҕэ саҥа баһылык Юрий ЗАБОЛЕВ кэлиэр диэри (2007 с. диэри) үлэлээбитэ. Дьыала-куолу бириигэбэрин быыһыгар Федоровы правительствоҕа икки сыл үлэлэтэллэр, онтон Игорь Тресков хонноҕун анныгар кыбыллан,  Росимущество Саха сиринээҕи ТУ-тын салайааччытын солбуйааччытынан барар. Федоров быйыл Айсен НИКОЛАЕВ саҥа дьаһалтатыгар таҥыллан киирэн эмиэ мээрийэҕэ үлэлии кэлбитэ. Кини мээр быыбарыгар Айсен НИКОЛАЕВ штабын салайбыта. Сурах быһыытынан, Федоров мээрийэҕэ төннүбүт биир сүрүн төрүөтэ - юрист үөрэхтээх кыыһын дьоһун дуоһунаска анньар баҕалаах.
***

"Мээрийэ дьыалатыгар" улаханнык хаарыллыбыт дьонунан буолбуттара: Елизавета НИКОЛАЕВА уонна Сергей ПЕТРОВ, кинилэр 8-7,5 сылга уураахтаммыттара. Ону сэргэ кыра болдьохтору  Юлия ПРУГОВА, Александр СОЛОВЬЕВ, Олег ШАРАВАРА, Геннадий СКАРДЖУС ылбыттара. 
Елизавета НИКОЛАЕВА соторутааҕыта холуонньаттан босхолонон тахсыбыт диэн сурах баара. 
Геннадий СКАРДЖУС «ЯКС» САО генеральнай дириэктэринэн олорон түбэспитэ. Кини үс сыл көскө уураахтаммыта даҕаны, сотору-сотору дьиэтигэр көстөрүн туһунан хаһыаттар суруйан тураллар. Скарджус оҕонньор уурааҕын болдьоҕун иннинэ босхоломмута, кэлин Новороссийскайга көспүт диэбиттэрэ даҕаны, соторутааҕыта Дьокуускайга баар сураҕа иһиллибитэ.
***
Игорь ТРЕСКОВ 2007 сыллаахха СР Баайга-дуолга миниистирин солбуйааччытынан анана сылдьыбыта, онтон 2009 сыллаахха Росимущество Саха сиринээҕи Территориальнай управлениетын салайааччытынан бу күҥҥэ диэри үлэлээтэ. Тресков Москваҕа ханнык дуоһунаска барарын аһаҕастык эппэт. Олох ааспыт нэдиэлэҕэ диэри "барбаппын, көспөппүн" диэн  журналистарга мэлдьэһэн баран, син биир чымыдаанын хомуммутун курдук хомунан-бэринэн, билиэтин сиэбигэр укта сылдьар буолан таҕыста.
***
 Быйыл сайын Тресков Москваҕа сырыттаҕына, кини салайар Росимуществотын офиһыгар дьэҥдьиир буола сылдьыбыта. Ол саҕаттан "Тресков төрөөбүт республикатыгар бэрсибэккэ эрэ Москвалаары гынна" диэн "бэлиэ биэрэн" дьэҥдьиир оҥоһуллубутун кэпсиир дьон бааллара. Сотору соҕус буолан баран, СУ СК салайааччытын солбуйааччыта Игорь Кононюк: «Наадата суох ажиотаж таһаарбыт следователлэр дьарыллыахтара" диэн пресс-конференцияҕа эппитэ.
Ол аата Тресковтыын уопсай тыл булбуттара дуу...
***
Игорь Тресков иккис кэргэнигэр олорор. Урут куорат телевидениетыгар үлэлээбит тележурналист саха кыыһын ойох ылбыта. Тресков биир уола быйыл Москваҕа МГИМОҕа туттарсан үөрэххэ киирбитин туһунан интервью биэрэигэр этэн турар. 

Аартык.ру