Өнньүөс сэлиэнньэтин баһылыга Мария ЗАХАРОВА "оскуола биһиги балансабытыгар туттарыллыбытаҕа, онон тугу да билбэппит" диэн харда биэрэртэн туттунна. Улуус дьаһалтатыгар сибээскэ тахсан баһылыгы ыйыталастыбыт - баһылык  Александр ЕРЕМЕЕВ уоппускаҕа барбыт, кинини солбуйар 1 солбуйааччы Василий ИЛЛАРИОНОВ оскуола дьиэтэ  "кыратык хайдыбыт, сиһилии тутууга солбуйааччыттан Михаил АРТЕМЬЕВТАН сураһыҥ" диэтэ. Оттон ол "тутууга солбуйааччы" төлөппүөнүн ылбат киһи буолан биэрдэ...

***

Өнньүөс оскуолатын генеральнай подрядчигынан  "СУ-98" ХЭТ эбит. "СУ-98" ХЭТ республика тыатыгар тутуллар государственнай сакаастарга саамай тиксэр ааттаах-суоллаах чааһынай тэрилтэ. Интернет сымыйалаабат буоллаҕына, "СУ-98" ХЭТ салайааччыта Алексей РОМАНОВ. Оттон РОМАНОВ былырыын от ыйын 19 күнүгэр СР архитектураҕа уонна тутуу комплексын миниистирин солбуйааччытынан анаммыта.  Солбуйааччы миниистир бэйэтэ бэйэтинэн хайдах мөлтөх хаачыстыбалаах тутууну туппута туһугар дьикти. Икки өттүнэн ситэриилээх былааска улахан дуоһунастаммыт киһи хайдах чааһынай тэрилтэ салайааччыта буолуон сөбүй?  
Билигин улуус дьаһалтата уонна тутууну хонтуруоллуур уоргаттар кыттыһан оскуола дьиэтин дьылҕатын быһаара сылдьаллар диэн иһитиннэрии баар: көтүрүллэр эбэтэр өрөмүөннэнэнэр? Быһаарыы ханныгын да иһин бюджет харчыта мөлүйүөнүнэн итиирэ сабаҕаланар.
***

"СУ-98" ХЭТ 2012 сыл атырдьах ыйын 13 күнүгэр СР Арбитражнай суутугар «Служба государственного заказчика Республики Саха (Якутия)» государственнай казеннай тэрилтэттэн 37 102 689, 76 солкуобайы көрдөөн үҥсүбүт сайабылыанньата көрүллүөхтээҕэ. ХЭТ үлэтин Сулууспа төлөһө илигэ суут дьыалатын төрүөтүнэн буолбут. Билигин, ити Өнньүөс оскуолатытттан сылтаан, ким кими суукка биэрэрэ биллибэт. 

Аартык.ру