Оттон бу бүгүҥҥү пресс-конференция тэрийээччилэринэн Республикатааҕы "ОДьКХ реформатын туһугар" общественнай хамсааһын председателэ Александр СИДОРОВ уонна Дьокуускай куорат Думатын дьокутаата, ону сэргэ саҥа тэриллэн эрэр "РФ Олох-дьаһах коммунальнай партиятын" олохтоох лидерэ Алексей ПЕТРОВ буолаллар.

Боростуой норуот политикаттан ыраах. Тоҕус ый томороон тымныылаах хоту сиргэ итии, сылаас, уу баар буолла да, дьон-сэргэ улахаҥҥа дураһыйыа да суох этэ. Ол гынан баран, бүтэһик уонча сылга ОДЬКХ систиэмэтигэр реформа, уларыйыы-тэлэрийии  бөҕө барар да, олохпут таһыма онтон тупсан-силигилээн барбыта көстүбэт. Кыс ортото дьон уута-хаара, ититиитэ суох хаалар түбэлтэлэрэ син биир тахса тураллар.

Урут да, аны да - коммунальнай хаһаайыстыба түгэҕэ суох уһаат диэн ааттанара. Харчы көрүллүбэт буолбатах, сыллата сүүстүү молүйүөнүнэн үп көрүллэр. "Ол барыта ханна барарый?" - диэн общественнай хамсааһын председателэ А.Сидоров ыйытар. Харчы ханна барарын-хамсыырын дьон-сэргэ бэйэтэ хонтуруоллуохтаах, оччоҕо эрэ уоруу тохтуоҕа диэн пресс-конференция тэрийээччилэрэ этэллэр. Кинилэр санааларынан, бу саҥа тэриллибит общественнай хамсааһын коммунальнай хаһаайыстыбаҕа тахсар коррупцияны тохтотуохтаах. Онно дьон быһаччы бэйэтэ кыттан, харчы хамсыырын хонтуруоллуохтаах  дииллэр.

"Якутия 21 век" интернет-телевидение редактора Лариса АНИСИМОВА Салайар Хампаанньалар (УК) өҥө поставщиктарыгар 800 мөл. солк. иэстээхтэр диэн сонун төһө кырдьыктааҕын сураста. 

Александр СИДОРОВ: "Иэс үөскүүр төрүөтэ биир: СХ-лар дьиэ олохтоохторуттан уокка, ууга, ититиигэ төлөбүр ылан баран "сиэптэригэр сүтэрэн кэбиһэллэр". Инньэ гынан, харчы "водоканалларга" да тиийбэт, "тэцтэргэ" да барбат. Түмүгэр онтон  боростуой дьон эмсэҕэлиир. Ол иһин олохтоохтор өҥө поставщиктарыгар быһа (СХ-ларынан эргиппэккэ)  төлөһүөхтээхтэр. СХ дворниктары, сантехниктары, электриктары туттун, ТЭЦ, Водоканал, о.д.а. өҥө оҥорор поставщиктар икки ардыларыгар "посредник" оруолун толорон, онтон харчыланан олороллорун тохтотуохха наада", - диир. 
"Наше время" хаһыат суруналыыһа Екатерина ЧЕМЕЗОВА хонтуруоллуур, ирдэһэр, туруорсар ньымалааххыт дуо, холобур, ити албыннаппыт дольщиктар интэриэстэрин көмүскүүргэ диэн ыйытта.
А.СИДОРОВ "Ил Түмэн вице-спикерин Е.Алексеева общественнай көмөлөһөөччүтэбин, ону таһынан биһиги хамсааһыммытыгар араас таһымнаах мунньахтар дьокутааттара эмиэ киирэллэр, түмүстэхпитинэ, сомоҕолостохпутуна элбэҕи ситиһиэхпит" диэн хардарда. 
Пресс-конференцияҕа суруналыыстары таһынан, Аграфена БОРИСОВА салайар  "Олоҥхо дойдута" дьиэ кооперативыттан албыннаппыт дьон делегацията кэлбит. Кинилэр ааттарыттан А.Иванов тыл эттэ. Кинилэр Билибин аатынан уулуссаҕа тутулла сатыыр дьиэ дольщиктара эбит. Дьиэ бэрт кыраттан иҥнэн хаалбыт. Правительство албыннаппыт дьоҥҥо субсидия көрбүт. "Ол харчыны тутуу ситэригэр ыыттарыҥ эрэ" диэн общественниктартан көрдөстө. 
Оттон элбэх дьону отоойкоҕо олордубут эргитиилээх-урбатыылаах "урвать" - урбаанньыт Аграфена БОРИСОВА тэрилтэтэ эстэн, "Олоҥхотун дойдута" тиһэх халлаанын тойугун туойан моҥкурууттаан эрэрэ биллэр. Иванов "Борисованы кытары иирсэри ирдээбэппит, дьиэбит тутулуннун эрэ" диэн баҕа санаатын эттэ.
Онон "уоруу - привычка, ол привычканы кытары охсуһуохха наада" диэн дьокутаат Алексей ПЕТРОВ этиитинэн бу пресс-конференция түмүктэннэ. Тыл олоххо киириэҕэр эрэниэҕиҥ.