Былаас уларыйбытын кэннэ, чуолаан Егор Борисов президент буолуоҕуттан, Уйбаан Шамаев оппозиция суолуттан туораан официальнай общественник быһыытынан билиниллибитэ. Инньэ гынан, Президент иһинэн тэриллибит Общественнай палата бэрэстээтэлин солбуйааччытынан кытары анаммыта. Кинини сэргэ Шамаев уруккуттан доҕоро, биир идиэйэлээҕэ, "Бичик" национальнай кинигэ кыһатын сүрүн  редактора Валерий Луковцев эмиэ ОП чилиэнинэн киирбитэ.
Общественность, РЛ салалтата туспа бас билэр дьиэни туруорсубуттара ыраатта. В.Штыров саҕана лицейгэ анаан сир тыырыллыбыта, былаан оҥоһуллубута. Ол гынан баран "үп көстүбэккэ" тутуу саҕаламмакка турбута. Дьэ, быйыл хамсааһын таҕыста.
Балаҕан ыйын 1-гы күнүгэр "Триумф" спорт дыбарыаһын таһыгар лицей дьиэтигэр анаан бастакы свая түстэ. Үөрүүлээх сиэргэ-туомҥа президент илэ бэйэтинэн кытынна. Онон, куорат 3-с поликлиникатын саҥа тутуутун курдук "долгострой" буолбакка, үп көстөн этэҥҥэ сотору лицей тутуллан үлэҕэ киириэҕэ диэн эрэнэбит.
***
Лицей уруккута РФМШ диэн ааттанара. Быйыл төрүттэммитэ 40 сыла. 1972 сыллаахха РФМШаҕа 80 оҕо үөрэнэ кэлбитэ.