Быһылаан тахсаатын, буоларын курдук, араас сурахтар-садьыктар, сабаҕалааһыннар, сыаналааһыннар, буруйдааһыннар, ырытыылар «оргуйа» түспүттэрэ. Маннык ыар буруйга уорбаланааччылар кимнээхтэрэ эмиэ уларыйа сылдьыбыта. Силиэстийэ уорганнара бу чахчынан РФ Холуобунай кодексатын 105-с ыст. 2-с чааһын «в» пуунунан, ол эбэтэр, бэйэтин көмүскэнэр кыаҕа суоҕа көстөн турар киһини соруйан өлөрүү бэлиэлэрэ баалларынан, холуобунай дьыала тэрийбитэ.

Бу дьыаланы СР Үрдүкү суутугар көрүү от ыйын 26 күнүттэн саҕаламмыта. Судьуйа – Алексей Кулагин, сууттанааччы – Александр Спиридонов, государственнай буруйдааччы – Татьяна Николаева, эмсэҕэлээччи – оҕо ийэтэ Люция Казакова, сууттанааччы интэриэһин көмүскээччи – Полина Парфенова. Дьыаланы бирисээгэлээх сэтээтэллэр сууттара көрөн, Спиридоновы РФ ХК 109-с ыстатыйатын 1 чааһынан, ол эбэтэр, сэрэҕэ суохтан өлүүүгэ тиэрдиигэ буруйдааҕынан билиннилэр. Прокурор буруйдааҕы 1 сыл 4 ыйга уопсай режимнээх холуонньаҕа көҥүлүн быһарга көрдөстө, оттон адвокат – усулуобунай миэрэни. Бириигэбэр аныгыс нэдиэлэҕэ, атырдьах ыйын 15 күнүгэр тахсыахтаах.

Бу дьыала суутун мунньаҕар суруналыыстартан Спиридон Татаринов («Сахалайф») биһикки эрэ сырыттыбыт. Хара саҕаланыаҕыттан, биир да күнү көтүппэккэ сылдьыбыт буолан, ааҕааччыларбар дьыала ис хоһоонун, суут силиэстийэтин туһунан толору хартыынаны тиэрдэр кыахтаахпын. Онон, сиһилии суруйууну «халыҥ» хаһыаппыт атырдьах ыйын 16 күнүнээҕи нүөмэригэр, «Киһи уонна сокуон» аныгыскы балаһатыгар ааҕаарыҥ.

Вера МАКАРОВА, "Саха сирэ" анал. корр.