Дьокуускай ураты архитектурата – Айсен НИКОЛАЕВ тус эппиэтинэһэ!

Понедельник, 06 Августа 2012 19:53
Оцените материал
(0 голосов)
Аартык.ру Дьокуускай куорат 203-с түөлбэтин тутуутугар сыһыаннаах элбэх суруйуулары таһаарда. Общественность, куорат олохтоохторо сахалыы тыыннаах архитектураны олоххо киллэрэргэ уолдьаспытын, чуолаан, 203-с саҥа кыбаартал тутуллар буоллаҕына, “национальнай колорит” сүөгэйэ-сүмэтэ онно көстүөхтээҕин туруорсаллара уҕараабат.
Атырдьах ыйын 2 күнүгэр, Дьокуускай куорат Думатын бэрэссэдээтэлин солбуйааччыта Павел ПЕТРОВ, ааспыт ыйга общественность кыттыылаах 203-с кыбаартал тутуутугар анаммыт Төгүрүк остуол түмүгүнэн мунньах тэрийдэ.
Санатар эбит буоллахха, от ыйын 24 күнүгэр ыытыллыбыт “203: хайдах буолуохтааҕый?” диэн улахан айдааннаах Төгүрүк остуолга архитектордар, худуоһунньуктар сойуустара, куорат олохтоохторо уонна саҥа кыбаарталы тутарга сирин арендалаан олорор “РДР-Групп” ХЭТ генеральнай дириэктэрин солбуйааччыта С.Новгородов кыттыбыттара. “РДР-Групп” чааһынай тэрилтэ тэрийээччилэрэ “РФА-Инвест” (СӨ үбүн миниистирэ Валерий Жондоров), “ДСК” ААО (Александр Берш) уонна “РИК” ААО (Виктор Ефимов).
Бу сырыыга дьаһалта дьиэтигэр куорат салалтатын үлэһиттэрэ, Дума дьокутааттара, “ДСК” ААО бэрэстэбиитэллэрэ, суруналыыстар уонна 203-с кыбаартал былааннаммыт бырайыагын уларытарга туруорсар Көҕүлүүр бөлөх чилиэттэрэ кытыннылар. Эрдэ түһэн биллэрдэххэ, опуторунньукка, атырдьах ыйын 7 күнүгэр, 203-с кыбаартал тутуутугар общественнай истии ыытыллыахтаах.
Дьокуускай куорат баһылыга Айсен НИКОЛАЕВ быһаас мээргэ талылларыгар киин куорат архитектуратын улаханнык сирбиттээх. Быыбар саҕанааҕы хаһыаттары арыйан көрдөххө, Айсен Сергеевич Дьокуускай архитектуратыгар сыһыаннаах тылларын булуохха сөп. Холобур:  “Хас биирдии куорат син биир киһи тэҥэ туспа организм. Хатыламмат устуоруйалаах, түспүт-тахсыбыт суоллаах-иистээх, олорбут олохтоох. Хас биирдии киһи бэйэтэ туспа сирэйдээҕин-харахтааҕын кэриэтэ, куорат эмиэ ураты архитектуралаах, стиллээх буолуохтаах. Ол, КПД дьиэҕэ сахалыы оһуор түһэриллибитинэн эрэ муҥурдаммат. Норуот ураты өйө-санаата, сыаннаһа архитектураҕа, дьиэ ис-тас элеменнэригэр көстүөхтээх. Арассыыйа хотугулуу-илин эҥээригэр Дьокуускай курдук кырдьаҕас, баай устуоруйалаах куорат суох. Биһиги эмиэ уратыбытын «кэпсиир» тутууларданыахтаахпыт. Билигин оннук кыах баар, суох буолбатах”, - диэн кини эппитэ.
Онон куорат олохтоохторо мээрбитигэр ити тылларын санатарбыт тоҕоостоох буолсу.
Павел ПЕТРОВ ыыппыт атырдьах ыйын 2 күнүнээҕи мунньаҕар биллибитинэн, 203-с кыбаартал тутуутугар анаммыт общественнай истиигэ кыттар экспертнэй бөлөх тэриллиэхтээх эбит. Ол туһунан дьаһалы баһылык Айсен НИКОЛАЕВ илии баттаабыт.
Аартык.ру эрдэ суруйбутун курдук, “РДР-Групп” ХЭТ бырайыагынан, 203-с кыбаартал эмиэ КПД-нан тутуллуохтаах. “Туймаада” баараҕай эргиэн дьиэтин үрдүгэр биир сахалыы оһуору “анньыбыттарыгар” үөрэн өлө сыспыттаахпыт. Саҥа кыбаартал КПДларын балконун өҥнөөх өстүөкүлэнэн бүрүйэн баран – “аныгы стиль” диэхтэрэ, панель үрдүгэр оһуор уруһуйдаан баран ирдиир “национальнай колориккыт” бу баар диэтэхтэринэ да көҥүл дьон.
Онон мээр Айсен НИКОЛАЕВ быыбар иннинээҕи эрэннэриитин толорон, эппитин курдук биир оһуорунан муҥурдаммакка, кырдьык дьиэтин-уотун – архитектуратын тутула омукпут өйүн-санаатын, олоҕу уонна аан дойдуну анаарыытын толору көрдөрөр гына тутулларын ситиһии – кини ТУС эппиэтинэһэ буоллун!

Добавить комментарий

Защитный код
Обновить

Aartyk.ru