Сахалартан силистээх-мутуктаах эбиппит диир алтай омук интернетинэн көҕүлээһининэн, сай сайын биир бэлиэ бэс ыйын 21 күнүгэр, Маскуба бириэмэтинэн 3-чаас 5-мүнүүтэттэн 14-мүнүүтэҕэ диэри, ол аата 9-мүнүүтэлээх “От кай” (Уот умай) диэн Аан Дойду үрдүнэн биир кэмҥэ уотка, күҥҥэ сүгүрүйээччилэр сиэрдэрэ-туомнара буолла. Сахабыт сиригэр хас да бөлөх бу Сир Ийэбитигэр улахан суолталаах тэрээһиҥҥэ кыттыспыппыт. (Ол туһунан кэпсээн.)

Билигин, бэһис төгүлүн ыытылла турар Азия оҕолорун оонньуута, туһүмэхтэн түһүмэххэ тупсан, кэҥээн, далааһыннанан иһэрэ кэрэхсибиллээх, кэскиллээх уонна үөрүүлээх, астыныылаах.

Ол эрээри, хас сырыы ахсын, (атын  тэрээһиннэргэ эмиэ) аан талыыларбыт мэлдьи стадиоҥҥа  киирии түгэнин хайдах тэрийэллэрэ, киһи тириитин таһынан киирэр. Бу сыыһаны элбэх киһи бэлиэтии көрөр. Ол - дьоммутун Күнү утары хаамтарыылара уонна хамсаттарыылара буолар. Сүүс буоллуннар, тыһыынча буоллуннар, аттаахтарыттан сатыыларыттан тутулуга суох. Күнү утары бокуонньугу эрэ тиһэх суолга хаамтараллар этэ, хаамтарыахтара даҕаны турдаҕа. Онон, хайаан да,  бу быһыыны   көннөрүнүө этибит.

Иккиһинэн манныгы санатабын. Биһиги, сахалар, киһи Аймахха саҥа сүүрээни киллэрэр сиэри-туому, күнү көрсүүнү, уруйдааһыны-айхаллааһыны 1990 сыллаахтан саҥа тыыннаабыппыт (дух). Манна бары кыттыгыстаахпыт. Билиҥҥитэ Аан дойдугаитинэн уратылаахпыт. Онон сибээстээн үөрүүлээх  түгэннэри күнү көрсүүттэн саҕалаан, уот иччитин сиэрин туомун толорору кытары сибээстиирбит ордук олохтоох, сөбүгэр сэҥээриилээх, ыйдаҥардар ыллыктаах, саргылаах суоллаах, айхаллаах аартыктаах буолуо этибит.

Атын омуктары үтүктэн, бырааһынньык, үөрүү-көтүү салюттаах буолуохтаах диэн эрэ туһуттан «хараҥаҕа» харбыалаһарбыт, халлааны хайытарбыт, атын эйгэлэри аймыырбыт, түүҥҥү салгыны сатарытарбыт сатаммат быһыы. Бу ыйга сүгүрүйээччилэр, киһини “таҥара” оҥостооччулар эйгэлэрэ.

Онон, бу көтөҕүллэр боппуруостарга, этиллэр бэлиэтээһиннэргэ кэмигэр болҕомто ууран, өбүгэбит сиэрин-туомун уларыппакка, сыыска-буорга тэпсибэккэ, сахалар дьиҥ итэҕэлбитинэн, норуот быһыытынан, аан дойдуга суол-иис, өйдөбүл, убаастабыл хаалларарбыт туһугар, алҕаспытын бэйэбит өйдөөн, туораталыырбыт хайаан даҕаны наада дии саныыбын.

 Степан Попов. 06.07.2012
"Кистэлэҥ күүс".