- Улахан эппиэтинэстээх быһаарыыны билигин ылаары олоробут. Өрөспүүбүлүкэ салайааччыта нууччалыы "Глава" диэн буолар, оттон сахалыы ким диэн ааттыахпытын туһунан дьону-сэргэни, общественноһы кытары улахан кэпсэтии таһаардыбыт. Түмсэ түһээт биир күн "Ил Дархан" буоллун диэн турбатыбыт. Кырдьык, элбэх араас аат киирбитэ. Барыта ырытыллан уонна суолтатын тыл үөрэхтээхтэрин, историктары кытары сүбэлэһэн баран - "Ил Дархан" буолара ордук дии санаатыбыт.
Хомуньуус Георгий Артемьев СӨ Төрүт сокуонун нууччалыы таһаарыытыгар "Глава" диэн тыл кэнниттэн скобка иһигэр "Ил Дархан" диэн тылы булгуччу суруйуохха диэн туруоруста. "Государственное Собрание (Ил Тумэн), Саха (Якутия) диэн суруйарбыт, этэрбит курдук "Глава (Ил Дархан)" диэн наар сырыһыннара сылдьыахха" диир. Артемьев итинник гынан" национальнай өрөспүүбүлүкэбитин кэлин губернияҕа кубулутаары соруннахтарына көмүскэл тэҥэ буолуоҕа" диэн эппитин Егор Афанасьевич утарда. Президент: "Государственное Собрание (Ил Түмэн)", "Саха (Якутия)" скобкаланыахтарын сөп, оттон Глава, Президент - персонифицированнай дуоһунас, онон итинник уһатар-кэҥэтэр табыллыбат. Холобур, "Глава (Ил Дархан) Республики Саха (Якутия) выступил в Государственном Собрании (Ил Түмэн) РС(Я)" диир олуонатык иһиллэр, дьон кулгааҕар эрэйинэн киириэ", - диир.
Итинник хардарыта саҥа-иҥэ кэнниттэн, дьокутааттар куоластаатылар уонна Төрүт сокуоҥҥа: "Глава" уонна "Ил Дархан" диэн тыллар тэҥ суолталаахтарын туһунан толоруу киллэрдилэр.
Аныгыскы талыллар президент, онон Ил Дархан диэн ааттанар буолла.
Биир хомуньуустар этэрээттэриттэн сылдьар дьокутаат Вячеслав Куличкин: "Билигин Арассыыйа үрдүнэн дуоһунастар ааттарын биир халыып оҥортоон эрэллэр. "Президент" диэн дуоһунас соҕотох судаарыстыба эрэ салайааччытыгар туттуллуохтаах. уоннаҕылар бары "Глава" буоллулар - "Глава республики", "глава района"... Оччотугар өрөспүүбүлүкэбит баһылыга "Ил Дархан" диэн ааттанар буоллаҕына, нэһилиэктэр, улуустар салайааччылар эмиэ "Дархан" диэн ааттаналлар дуо?" диэн оруннаах ыйытыыны биэрдэ.
Куличкин ыйытыытыгар ким да хардарбата - сапсыйан кэбистилэр.
"Сиэрдээх Арассыыйа" партия фракциятын чилиэнэ, норуот дьокутаата Зоя Корнилова "кэнэҕэс даҕаны Вице-президент дуоһунаһа баар буоларын" туруорса сатаата. "Быыбарга президент уонна вице-президент иккиэн кииристиннэр. Саха сиригэр икки титульнай нация баар: сахалар уонна нууччалар. Ити икки улахан дуоһунаска бэйэлэрин бэрэстэбиитэллэрин туруордуннар", - диэн этии киллэрдэ. Оччотугар атын омук, холобур, эбээн дуу, юкагир (дьэбириэй, чечен) дуу, буоллахпына, титульнай нация буолбатаҕым "буруйугар" бу дуоһунаска тиксэр бырааппыттан матабын?
***
Дьокутааттар бүгүн күн бэбиэскэтигэр киирбит 31 боппуруоһу барытын көрүөхтээхтэр.
Сорох дьокутааттар, "Ил Дархан" көннөрүүнү киллэрэн баран, "Тыгын Дархан" рестораҥҥа тахсан эбиэттээтилэр. Ол иһигэр Ил Түмэн сессиятын "дьаарай борогуулсуга - Сергей Выборнов Александр Морозкины кытары кыттыгас аһаатылар.
Выборнов бу сырыыга сессияҕа кэлбит төрүөтүн Aartyk.Ru нууччалыы информациятыгар көрүҥ -