Ол быыһыгар... хаайыыга эмиэ ыһыах ыһаллар. Политик алгысчыт эмиэ буолар
Суббота, 20 Июня 2015 19:18
Икки атахтаах ханна да буолтун иһин сырдыкка талаһар. Ол сиэринэн, хаайыыга сытар саха дьоно самаан сайыны көрсөр ыһыах ыһан... "ньиргиттилэр" диир сөбө суоҕа буолуо, бэрээдэк көҥүллүүрүнэн, алгыс сиэрин-туомун толордулар. Алгыһы Афанасий МАКСИМОВ оҥорбут диэн WhatsApp барахсан сэһэргиир. Үөһээ Бэстээх холуонньатыгар саха артыыстара ыалдьыттаабыттар: Аскалон Павлов, Лэгэнтэй, Паша Кофе, Светлана Бугаева, Галина Виноград.
Афанасий МАКСИМОВ ырыа ымыылаах хоһууннарын кытары - Лэгэнтэйдиин уонна Аскалоннуун "Күһүҥҥү" ырыаны бэрт аһыллан туран ыллаабыттар. Быһата былаас биэрэллэрэ буоллар, олох ылыах курдук иэйэн-куойан туран ыллаабыттарын интернет сэһэнньитэ сэһэргиир. Афанасий улахан сыанаҕа ырыаҕа холоммутун туһунан урут суруйан турабыт. Сэргиир буоллаххытына манна киирэн ааҕыаххытын сөп http://old.aartyk.ru/cultura/item/2868-kandidattar-yllyyllar-da-yllyyllar
Ону таһынан Аскалон табаарыһыгар Афанасийга "Иннибит диэки!" диэн анаан ырыа суруйбутун ыллаан сүргэтин көтөхпүт.
Хаайыы хараҥа хабалатыгар ылларбыт эр бэртэрин күүһүнэн холуонньа территориятыгар сэргэ туруорбуттар. Алгыһын эмиэ МАКСИМОВ оҥорбут. Киһибит талаана барыта арыллан эрэр диэн дьон сыана быспыт.
***
Аартык.ру
Комментарии