Кандидаттар ыллыыллар да, ыллыыллар...
Пятница, 19 Апреля 2013 00:39
Бэҕэһээ, муус устар 18 киэһэтигэр, Саха циркэтин дьиэтигэр Табаҕа холуонньатыгар Арчы дьиэтин тутарга анаан аһымал акция быһыытынан кэнсиэр тэрийдилэр. Тэрийээччилэр "Кистэлэҥ күүс" сурунаал редакцията уонна "Аар Айыы итэҕэлэ" общественнай тэрилтэ буоллулар.
Кэнсиэр афишатыгар ырыаһыттар ааттарын быыһыгар "Афанасий Максимов" диэн сурук баара. Ону сорох дьон: "Ил Түмэн депутата Афанасий МАКСИМОВ ыллыыр дуо?" - диэн ыйыттахтарына, "Манчаары сүрдээх кэрэ куоластааҕа дииллэрэ, онон Манчаарыга холоммут киһи ыллыахтаах буоллаҕа", - диэн дьээбэлэнэ сылдьыбыппыт баара... киһибит кырдьык-хордьук сыанаҕа тахсан "Эргиллии" диэн ырыаны тардан кэбиспит... туох да фонограмма - тыас-уус, уот-күөс - ирим-дьирим, дириҥ ис хоһоонноохтук туттуу-хаптыы... Ол айылааҕы хойутаан тиийэн истибэккэ хааллыбыт.
- Чэ, политикатыттан бүттэҕинэ, эрчиллэ түһэн баран ыллаан да аһыыһы, - диэн истибит киһи сыана быста.
***
Кэнсиэркэ биир эрэ политик ыллаабата. "Урааҥхай" общественнай түмсүү аатыттан тыл этэ тахсыбыт Петр АНДРЕЕВ микрофону төттөрү биэрэн бэрт. "Ыллыам" диэтэ да, ыллаан тоҕо барда: "оо, Бүлүү, оо Бүлүү-үү..." - иҥнэл-таҥнал хамсаныы, тобуктаах ыстаанын өрө тардыныы... Быар быһынна, харах уолла.
Онуоха туран, биһиги киһибит - Мэхээлэ ЭЭБИРИСТЭП баар эбит ээ! Уот сулус хаалтыһа прожектор уотугар күлүмүрдээн ылла да, Ылдьыыс ойон турда, арена ортотугар сулбурҕаччы хааман тиийдэ да урукку саллаатын кытары: "...мин таптыы-ыр өрүһүү--үүм"... Көрөөччү дьоллонон өлө сыста.
***
Өссө биир политик чөмчүөрүйэн олорорун таба көрдүбүт - Гордума депутата Алексей ПЕТРОВ. Убайдар кэннилэриттэн кэрэ куолаһын иһитиннэриэн туттунна. Имик-самык уот быыһыгар уоһун иһигэр мичээрдии олороро көстөр. Кэнсиэр бүппүтүн кэннэ тыаһа-ууһа суох харчы хомуйар дьааһыкка үөмэр-чүөмэр үктэнэн тиийэн "сөптөөх позаҕа" туран кумааҕы укта.
***
Кэнсиэр 3 чааһы быһа буолбут. Инники өттүгэр чыыннаах-хааннаах дьон көстөллөр үһү да, түмүгүн булбакка үксүлэрэ дьиэлээбиттэр.
Фойеҕа көрөөччүлэр таҥастарын ылаары уочараттаан турдахтарына, кандидаттарбыт таҕыстылар. Дьон уокка оҕустарбыт курдук таттаран ылла, онтон, ордук дьахтар өттө "уой-аай" айманан МАКСИМОВ үрдүгэр саба түстэ. Уол уоһа ыпсыбат - "Дьол 2013" номинация толору хаһаайына буолла.
Тула көтө эргитэ сылдьан хаартыскаҕа түһэрии, симиллэ-симиллэ дьокутааттыын алтыһыы, алларааттан, ойоҕостон өрө-таҥнары көрүү. Арааһа, кэнсиэркэ ыллаабыт эстрада "сулустара" политиктарга тааллара кырыыланнаҕа буолуо.
Ылдьыыс төлөппүөнэ хал буолбат, биир кэм тырылыыр-ыллыыр - сөкүүндэҕэ солону биэрбэт. Төлөпүөнүн булкуйарын быыһыгар ким эрэ кинини тардыалыыр, ханна эрэ ыҥырар-угуйар, илии тутуһан эҕэрдэлиир.
- Ылдьыыс, төһөнү дьааһыкка уктуҥ? - диэн ыйытыыга, Петр АНДРЕЕВА хап-сабар кини оннугар - 20-ни! - диир.
- Онтон, эн? - биир илиитин тарбаҕын саратар.
***
Инньэ гынан, Табаҕа холуонньатыгар Арчы дьиэтин тутарга бу кэнсиэргэ барыта 100-тэн тахса тыһыынча лаппа киирдэ, быһыыта.
***
Аартык.ру
Комментарии
Тойон-хотун толлор киЬитэ буолан эрэр эбит
"Нутчина5а тылыгар хаптарбыт уЬу" диэн кэпсэтэр буолан эрэллэр