Былырыын сайын, бэс ыйыгар, артыыстары кытары Бэстээх хаайыытыгар барса сылдьыбытым. Сахаҕа БЭС ЫЙА диэн ураты улахан суолталаах, дьэҥкир ыраас салгыннаах, олох эргиирин биир саҥа күүрээнэ саҕаланар саамай күүтүүлээх күндү ыйа этэ буоллаҕа. Ону баара, “хаайыы” диэн ыар тыыннаах хатыылаах боробулуохалаах сиргэ тобус-толору саха эдэркээн уолаттара, дьэ күннэрэ-уохтара тыгар үгэннэригэр сылдьар ыччат хара робаны кэтэн кубарыйан тураллара олус да хараастыылаах көстүү этэ. Ама, бу сахалыы тыллаахтар бары түөкүн, өлөрүөхсүт буолан төрөөбүттэрэ эбитэ буолуо дуо... Тоҕо элбээбиттэрэй?! Ыччата быһа туппут аҥаара хаайыыга хараллар норуот туох кэскиллээх буолуоҕай?..

Итинник огдолуйуу суолуттан бу ыччаттарбытын туох быыһыах эбитэ буолуой? Итэҕэл? Сахалыы, төрүт ИТЭҔЭЛБИТ?

***

Муус устар 18 күнүгэр, Саха циркэ дьиэтигэр киэһээ 19.00 чаастан “Итэҕэл күүһэ” диэн көмө кэнсиэр тэриллэн эрэр. Тэрийээччилэр: “Кистэлэҥ күүс” хаһыат-сурунаал редакцията (редактор Марина ПЛАТОНОВА) уонна Дьокуускайга баар “Аар Айыы Итэҕэлэ” тэрилтэ.

Кэнсиэр сыала-соруга диэн: Табаҕа хаайыытыгар олорор саха ыччатыгар Арчы Дьиэтэ тутуллларыгар үп-харчы хомуйуу. Билиэт сыаната 500 солк. Каасса төлөппүөнэ: 42-95-68.

***

Буруйу оҥорбут ыччаппыт киһилии олоххо төннүөн баҕарарын өйөөн кэнсиэркэ кэлэргитигэр саха санаалааҕы барыгытын ыҥырабыт. Бу ааксыйаны өйөөн дьоҥҥо-сэргэҕэ ыллыахтара-туоцуохтара:

Эдьиий Марыына, Айталина Адамова, Лэгэнтэй, Сиэйэ Уола, Чыскыырай, Айаал Сильверсан, Ваня Трофимов, Афанасий Максимов, Людмила Акимова, этно-рок бөлөх “Айтал” уо д.а.

***