Ас амтаннааҕа, эт сыалааҕа, үүт үрүмэлээҕэ,  бастын олбох “дружбиска” буолара үһү. Дьэ, атыыр аатырыы. Киһилэрэ дьоһумсуйан барбах саҥарар-хамсыыр, нэһиилэ сүөдэҥниир. Итэҕэһэ суох биир тылынан – хоруол! Ол оннук дьаабылана сырыттахтарына ааһан иһэр ньуучалар: “Чё, это делаете”, -  диэн баран редукторын сытыары эргитэн баран турбутунан мастарын быһа сотон кэбиспит.

... Ол онтон ыла туран эрбиир буолбуттар.

Аны, арба сыаптарын билиҥҥи курдук сытыылаабаттара үһү, үөһээ өттүттэн сытыылаан сыап бөҕөтүн бүтэрэллэр эбит.

***

- Оо, дьэ, маннык... өрдөөххө мыыла тэнийэ илигинэ, хотуттан соҕуруу биир киһи үөрэнэ барбыт. Онно ону-маны биллэҕэ дии, сайдыы тугун, “гигиена” эҥин диэни. Бүтэрэр  сылыгар дьонугар кэһии ыыппыт. Тугун-туоҕун өйдөөн-дьүүллээн быһаарбатах. Ону оҕонньоттора ас диэн кырбастаан  ньэмньээрдэн кэбиспиттэр.

Үөрэхтээхтэрэ үөрэҕин бүтэрэн сайын кэлэн сураспыт “кэһии хайдаҕый” диэн. Ону: “Аташым, аһыҥ аштык этэ да, аҕырымньылаах (хос, ыылаах амтаннааҕы этэллэр) согуш этэ”, - диэбит.

***

 

- Буот. Аны, сампаан кэлбит. Эмиэ кэһии. Оҕонньоттор ойохторуттан кистээн аһы ас курдук дьаһайардыы сананан, аны санаатахха пуорт диэки быһыылаах, мустубуттар. Биэс-алта курдуктара үһү. Чэй өрүммүттэр эҥин. Сыыйа арыйбыттара, тыаһа дьикти буолбут! Саллан төттөрү хаппахтыы туппуттар. Ырытыы буолбут: итинник буоллагына, дөйүтэрэ  кыахтаах буолуохтаах, сыыгынаан моҕойго дылы буолан, арааһа солуурга кутан убатыллыыһы диэн. Ууга умсары куталлар. Чочумча  кэтэһэн көрөн баран, сэрэнэ-сэрэнэ иһэллэр. Кырдьаҕастара: “Ноколор, сэрэнэн иһиҥ...” – диэн сэрэтэлиир.

Кыра-кыралаан барбах сыпсырыйан иһэллэр да,  туох кэлиэй, уу ньаламаан буоллаҕа. Ону: “Туох да биллибэт ээ”, - дэһэллэр. Кырдьаҕастара: “Сэрэниҥ! Биирдэ дөйүтэн кэбиһиэҕэ...”, - диэбит.

...Онтон бэттэх, уунан убатыллыбыт сампаантан ким да дөйбүт сураҕын истэ иликпин.

***