Алҕас дьол

Понедельник, 18 Марта 2013 08:35
Оцените материал
(1 Голосовать)
Ардах кыралаан таммалыыр. Куорат уота ыраах кылайар. Биһиги оонньоон ханна эрэ ыраах баар, оттон массыына түннүгүн нөҥүө күһүөрү сайын үһү.
үстэн тахса сыллааҕыта сайыҥҥы абылаҥ салгыыттан салгыылаах буолуо диэн өйгө да суоҕа.
Абылаҥ ааһар аналлаах, уостар уратылаах. Бүгүн эн, сарсын атын, бүгүн бэрт сарсын. Дьылҕа хаан дьиктитик булсуһуннарбыта, салгыытын эмиэ кини тиһэн эрдэҕэ. Онно бас бэринэн дуу, мин кэтэспэтим да иһин кэлэҕин, тоҥуйбун уулларан бараҕын, сайыһыннараҕын, санньытаҕын, сааратаҕын даҕаны. Ол тухары туох-туох буолбатаҕай. өлө этиһэн да баран өрүттэрбит, атырдьах маһыныы арахсыбыттыы айдаарсан да баран алтыһарбыт. Ол тухары биһиги остуоруйабыт иһигэр киирэ сылдьыбыт дьон олоҕо уларыйан истэ. Ким хаайыыга киирэн баран таҕыста, ким ойохтонно, ким эрдэннэ, оҕо-уруу тэриннэ, ким олохтон туораата. Ол тухары бэйэбит да киһи сөҕүөн курдук уларыйдыбыт. Сыыйа-баайа эн улаатан, эр киһи киэптэнэн истиҥ. Кэлиҥҥинэн олоҕуҥ туһаайыытын тосту уларытан сөхтөрдүҥ. Ону билиминэ эрэ мин эмиэ үчүгэй өрүттэрбин үүннэрэ сатаатым. Эн тускар буолуо дуо ол барыта? Эн миигин хайҕаатыҥ. Эн мин үчүгэй буоларбар баҕарбытыҥ ыраатта. Хара маҥнайгыттан иитэ-үөрэтэ сатыыргын истэн эрэ кэбиһэрим. Оҕоттон ыйыта сылдьыам дуо, хайдах олорорбун, тугу гынарбын диирим. Билигин барыта атын. Бэйэм да сөҕөбүн – бэйэбин уонна ордук эйигин. өссө да сайдыаҥ турдаҕа, олоҕуҥ остуоруйата кульминациятыгар тиийиэ ыраах буоллаҕа. Мин да финалга ыксаабаппын, эйигинниин интригабын хайа кыалларынан уһата сатыыбын. Саамай ыар кэмнэрбэр эн баарыҥ күүспэр күүс эппитэ, салгыы олорорго сылтах буолбута. Оттон билигин олоҕум ис хоһоонун байытарга, тупсарарга матыып буолан эрдэҕиҥ.
Бүгүн күннэтэ сылдьар кулууппар кэргэннии буолар туһунан кэпсэтэн аһарбыппыт. Онно мин «БРАК» диэн тылы утарабын диэн билиммитим. Хайа да таптал талыытыгар, дьол уйатыгар, ыал баайыытыгар бу баар сыһыаны, билиҥҥи турукпун биир бэйэм биэриэ суохпун. Бу иннигэр аҥаардас адреналин туһугар хардарыта хапсыһан ылар эбит буоллахпытына, хайа муҥун, уоскуйан, уйан суолу таллахпыт, уора-көстө дьолу ирээттэстэхпит.
Таһырдьа ардах түһэрэ кытары чуумпу дьол сорҕотунан буолан ылар. Хоһоонунан хоһуллуох холку түгэн сарсын эмиэ хатыланыах курдук. Эдэр иитэр эрэлин илдьэ дьиэбэр супту киирэбин. Сарсыҥҥыны сэмээр кэтэһээри, эйигин өссө биирдэ таптаары, биир күнүнэн эн тускар тупсаары, маннык өрүү буолуо диэн итэҕэтээри. Бу киэһэни бараары эн биһиэхэ анааммын бу лоскуйу тиһэбин. Хаһан эрэ мин суохпар дьыала-куолу, ахтыы архыыба аҥаардаах тиһилик иһигэр кистэммит анабылбын булаҥҥын ааспыт алҕас дьолбутун ахтан-санаан ыллар диэн. Биир дьахтары быстах дьоллообут, хаһан да умнуо суох буолбут уйан уолум ол сахха ханна, кимниин буолуоххун сэгэтэн көрөр кыах суох. Кэлэргэ онто да суох кэмин иннинэ тиийэммин бу суруйа олордоҕум.
Суох, бу баарга мин төннүүм, эн уонна мин өссө да биир кэмҥэ, биир сиргэ биир баайыланан баарбытыттан да дьоллонуум. Баҕар, таптыым, баҕар, таптаамыым – эн син биир миэнэ буоларгыттан көннөрү дьоллонуум.
***
Венера Петрова – ЧЭГДЭ.
 

Добавить комментарий

Защитный код
Обновить

Aartyk.ru