Санатар эбит буоллахха, Иван Семенович ракета тобохторо Саха сиригэр түһэллэрин букатын утарар. Кини саахал таҕыстаҕына гептиллээх уматык сири-уоту, дьону сутуйуо диэн куттанар. “Саахал тахсыа суоҕа  диэн ким да мэктиэлээбэт. Саахал тахса турар, суох буолбатах. Саха сирин үрдүнэн көтөр ракеталарга саахал тахсыа суоҕа диэн андаҕайаллара эбитэ буоллар, дьэ оччоҕо мин олох утарыам суоҕа этэ”, - диэн кини уруккуттан туруорсар. Оттон Роскосмостар "саҥа ракеталарга гептиллээх уматык туттуллубат" диэн айахтара кытарар. 

Күн бэҕэһээ ыытыллыбыт Роскосмостар көрсүһүүлэригэр сылдьан баран Иван БУРЦЕВ этэр:

-          Көрсүһүү саамай сүрүн тиэмэтэ – ОВОС (оценка воздействия на окружающую среду) түмүгэ буолуохтаах этэ. Ону бу көрсүһүүгэ ким да ол туһунан билиһиннэрбэтэ да, кэпсээбэтэ да, эгэ дьүүллэһиэхтэрэ дуо?! Таах “галочка” туһугар мероприятия ыыттылар, - диэн кини улаханнык абарар. - Роскосмостар Бүлүүгэ, Алдаҥҥа, Өлүөхүмэҕэ нэһилиэнньэни кытары көрсүһэрин көрсүбүттэрэ. Көрсүһүү көрсүһүүнэн, отто докумуоннар ханна баалларый?! ОВОС кэнниттэн билигин Росприроднадзор государственнай экспертизэтэ ыытыллыахтаах. Ол дьон быраты үүт тураан “үчүгэй”, нэһилиэнньэ утарбат  дииллэрэ чахчы. Урут общественнай экспертизэ диэн баара, ону мэлиппиттэрэ.  Ракета тобоҕо түһүөхтээх улуустарыгар Роскомос уонна маннааҕы Айылҕа харыстабылын министерствота сир, буор, салгын, уу химическэй аналыһын оҥорбуттара. Анаан-минээн,  уруккуттан чөл сирдэртэн проба ыла сатаатылар. Холобур, Ньурбаҕа Тобонов (эколог, урут ракета тобохторо түспүт сирдэрин чинчийбитэ) ыйбыт сирдэриттэн проба ылбыттара эбитэ буоллар, баҕар гептил да көстөн тахсыах этэ, - саарбахтаабат Иван Семенович.  

***

Аартык.ру