Бу нэдиэлэҕэ Дьокуускай куорат суута ШАРКОВСКАЙЫ дьүүллээтэ уонна хаста да итирик сылдьан, бырааба суох  атын киһи массыынатынан урут эмиэ тутулла сылдьыбытын үрдүнэн,  түҥнэри көппүт эдэр уола өрүһүммэттии инбэлииккэ кубулуйбутун үрдүнэн, судьуйа 1 сыл 6 ыйга эрэ дьиэ хаайыытыгар уураахтаата. Ону сэргэ 17 тыһыынча хамнастаах тренери 500 тыһыынча солкуобайынан саатын куттарарыгар эттэ.

Быраабы көмүскээччи общественниктар "саат куттарыы - хаһан да төлөммөт, туһата суох харчы" диэн ааттыыллар. Ол докумуоҥҥа ыйылларынан 17 тыһ. хамнастаах тренер ычык-бычык хамнаһыттан бырыһыаннаан 500 тыһ. солкуобайы хас эмэ уонунан сыл  төлүө эрэ төлөөмүө эрэ. Онон үлэлиир сириттэн прокурор эппитинэн "үчүгэй характеристикалаах спортсмен" бүтүн киһини, кини дьиэ кэргэнин үйэ-саас тухары сорго-муҥҥа тэбэн баран аатыгар эрэ усулуобунай болдьоҕу ылла. 

Россия үрдүнэн итирик суоппардары утары кырыктаахтык киирсиэххэ наада, сылын аайы сүүһүнэн тыһыынча дьону итирикситтэр өлөрөллөр, эчэтэллэр диэн сокуону кытаатыннара турдахтарына, ШАРКОВСКАЙ ситигирдик "мааныламмыта" саныахха сүөргү. Сатахха, буруйдаах-буруйдаах курдук туттан суукка кэлиэх, сылдьыах этэ, ону баара ол киһийдэх сибээһэ, силиһэ-мутуга киэҥигэр эрдэ эрэнэн эбитэ дуу, атын куораттарынан күрэхтэһэ баран хаалара диэн кыһыйаллар. 

Спорт, спортсмен - диэн чөл олох, кыраһыабай, чэгиэн эт-сиин, өй-санаа, быһыы-майгы диэн өйдөнүөхтээх этэ, дьиҥинэн. Ону баара, биһиэхэ барыта таҥнары: сибээс, клан, криминал...
 
Эмсэҕэлээбит уол дьоно суут уурааҕын кытары сөбүлэспэттэр: "Ааһыныахпыт. Буруйдаах киһи буруйун боруостуохтаах. Дьиҥнээхтик", - диэн кытаанахтык киирсэр санаалаахтар. 

***
Марина ЗАХАРОВА,
"Аартык.ру" анаан.