- Россия Накаастабылы толорор федеральнай сулууспатын Саха сиринээҕи управлениетын начальнигын солбуйааччы, ис сулууспа полковнига Геннадий Качаев биһиги хаһыаппытыгар иһитиннэрбитинэн, Юлия Пругова Иркутскай уобалас 4 №-дээх холуонньатыттан УДО-нан («условно-досрочное освобождение») 2012 сыл сэтинньи 9 күнүгэр босхоломмут. Елизавета Николаева холуонньатын режимэ уларыйан, Иркутскайдааҕы холуонньаттан былырыын этаптанан кэлэн, билигин Дьокуускай куорат 2 №-дээх көс-холуонньатыгар буруйун салгыы боруостуур. Ол эрэн, доруобуйатын туругунан, кини дьиэтигэр олорорун, кэлэн бэлиэтэнэн барарын көҥүллээбиттэр – сокуон ону утарбат. Е.Николаева болдьоҕун иннинэ босхолонорго хадатаайыстыбаны 2014 сыл олунньу 19 күнүттэн саҕалаан биэриэн сөп. Онтон Сергей Петров билигин да Табаҕатааҕы 7 №-дээх кытаанах режимнээх холуонньаҕа буруйун боруостуур, кини УДО-ҕа хадатаайыстыбатын 2014 сыл муус устар 2 күнүттэн саҕалаан биэриэн сөп. Ол эбэтэр, Николаева да, Петров да, режими кэһиилэрэ суох, бэрээдэктэрэ үчүгэй буоллаҕына, эһиил босхолонуохтарын сөп.

- Дьэ, бу кырдьык. Полковник Геннадий Качаев иһитиннэрбитинэн, Үөһээ Бэстээхтээҕи 3 №-дээх уопсай режимнээх холуонньаҕа буруйун боруостаан олорор Ваник Нерсесян УДО-та бу дьыл муус устар 17 күнүттэн саҕаланар. Бүгүҥҥү күҥҥэ диэри бу хаайыылаах биир да миэрэтэ, режими кэһиитэ суох, бэрээдэгэ үчүгэй. Онон, муус устар ыйга босхолонон хаалыан сөп. Санатар буоллахха, В.Нерсисян 2011 сыл ыам ыйыгар сууттанан, 4 сыл 6 ыйга уопсай режимнээх холуонньаҕа көҥүлэ быһыллыбыта.

- «Саха сирэ» хаһыат бу дьыл тохсунньу 26 күнүнээҕи нүөмэригэр иһитиннэрбиппит курдук, Афанасий Максимов, Игорь Чикачев, Игорь Пахомов уонна Владимир Рожин холуобунай дьыалалара Дьокуускай куорат федеральнай суутугар тохсунньу 24 күнүттэн саҕалаан, хаттаан көрүллэ сылдьар. Судьуйа – Валентина Хорулинская. Барыта саҥаттан көрүллэр, онон, суут уурааҕа тахсыа ыраах. Бу улахан айдааннаах дьыала түмүгүн хайаан да иһитиннэриэхпит.

РФ Судьуйаларын үрдүкү квалификационнай коллегиялара Людмила Горева үһүс болдьоххо ааһарыгар өссө былырыын, ахсынньы ыйга рекомендация биэрбитэ. Ол эрэн, кинини үһүс төгүлүн СР Үрдүкү суутун бэрэссэдээтэлинэн аныыр туһунан РФ Президенин Ыйааҕа күн бүгүнүгэр диэри тахса илик. Онон, бу дьыл олунньу 28 күнүгэр Людмила Горева алта сыл боломуочуйалаах болдьоҕо бүтэн, билигин уоппускатыгар сылдьар.

Билигин СР Үрдүкү суутун бэрэссэдээтэлин эбээһинэһин кини бастакы солбуйааччыта Елена Снегирева толоро сылдьар. Санатар буоллахха, Елена Снегирева СР Үрдүкү суутун бэрэссэдээтэлин бастакы солбуйааччытынан 2009 сыл бэс ыйыгар ананан кэлбитэ.

Холуобунай дьыалаҕа эриллэн, федеральнай ирдэбилгэ сылдьар генералы билиҥҥээҥҥэ диэри була иликтэр. Бу ыйытыыны РФ Силиэстийэлиир кэмитиэтин Саха сиринээҕи управлениетын салайааччыта Олег Мезриҥҥэ, СР ИДьМ-тын министрэ Виктор Кошелевка биэрэн турабыт. Кошелев: «Стахов тайҕаҕа саһан сытара буолуо диэтэххэ, итэҕэйиэххит дуо? – диэн Стахов туһунан ыйытыылары тириитин таһынан истэрин өссө төгүл биллэрбитэ, – республика полицията кинини көрдөөһүнүнэн дьарыктаммат буолбута ыраатта, Россия ИДьМ-тын соруйуутунан, кинини ирдиир-көрдүүр дьыала 2012 сыл алтынньы 19 күнүттэн Московскай уобаластааҕы ис дьыала кылаабынай управлениетыгар бэриллибитэ». Онон, Яков Стахов тутуллубутун-тутуллубатаҕын Москва полициятыттан эрэ истэр кыахтаахпыт.
***