***
Халбас харата - Владимир Данилов
Росимущество Саха сиринээҕи управлениетын, Игорь Тресков иннинэ, бэрт дьиктилээхэй киһи, билигин олигарх Михаил Прохоров баанын Саха сиринээҕи салайааччытынан анаммыт – Владимир Данилов салайан олорбута.
Данилов салайбыт кэмигэр федеральнай баай-дуол, дьиэ-уот, сир-дойду - сокуону араастаан “имитии” түмүгэр, босхону эрэ үрдүнэн биирдиилээн дьон бас билэр тэрилтэлэригэр “хааман” хаалбыттарын туһунан элбэх сэһэн-сэппэн баара.
Москва бэрэбиэркэлээччилэрэ булбуттарынан, Данилов саҕана атыыламмыт судаарыстыба баайа-дуола тоҕо эрэ наар эргиэмсик Александр Федоров тэрилтэлэригэр кэлэн кэтиллэр эбит.
Оттон норуокка “суон сураҕырбытынан” Ваучер Һаасканы билбэт ыал Саха сиригэр суох. Тэрилтэ бөҕөтүн араастаан үктэтэн атыылаһан ылан баран, суор-тураах аһылыга оҥортолообут Александр Федоров, бу адьас соторутааҕыта бүтүн Арассыыйа судаарыстыбатын историятыгар улахан суолу-ииһи хаалларбыт “Золото Якутии” АОну моҥкурууттатан олорор. Бэл, президент Егор Борисов “бу сүүлүк, аферист” диэн Федорову сөмүйэтинэн көрдөрө да сатаабытын үрдүнэн, быраабы араҥаччылыыр уоргаттар киниэхэ кэлэн илиилэрэ-атахтара бааллан хаалара сөхтөрөр. Кими эрэ була сатаан буруйдууллар, кими эрэ көстөн турарга даҕаны балыйбаттар...
***
“Федоров-Данилов корпорейшн”
Росимущество Саха сиринээҕи управлениетын Владимир Данилов 2007-2009 сс. салайан олорон, атаһыгар-доҕоругар, компаньонугар (салгыы бэйэҕит толкуйдааҥ) Александр Федоровка куорат киинигэр офис тэбэн биэрэртэн саҕалаан “өрөмүөн суотугар” диэн ааттаан барыта 400 тыһ. тахса суумалаах хоромньуну судаарыстыбаҕа оҥорбут. Ол туһунан суруналыыс Елена Тихонова “В Якутии.ру” интернет-хаһыакка хаста да төхтүрүйэн сиһилии суруйан турардаах. “Сиһилии суруйуу” быраабы араҥаччылыыр уоргаттары тоҕо эрэ харахтарын баайыытын өһүлбэт. Туһугар эмиэ биир дьикти.
Холобурга диэн, элбэхтэн биир афераны кэпсээтэххэ маннык.
Росимущество салайааччыта Владимир Данилов дьаһалынан, судаарыстыба бас билиитэ - эргиэмсик Александр Федоров тэрилтэтигэр барар “классическай схематын” быһыытынан Ленин пр., 35 – Лермонтов уул., 28-ттан саҕаланар.
Ленин проспегын 35-гэр турар дьиэ, 500 кв.м иэннээх 1-кы этээһэ - Лермонтов уулусса 28-гар турар дьиэ 4-с этээһигэр атастаһыллар.
Куорат киинигэр, кэлиилээх-барыылаах сиргэ, 1-кы этээскэ турар атыы-тутуу саалата - кыбычыын, массыына эрэйинэн киирэр-тахсар, дэбигис киһи сатыы сылдьыбат 4-с этээскэ, биир-биэс кэпиэйкэтэ суох атастаһыллан хаалар. Биллэн турар, аны да, былыр да, куортам сыаната проспекка хас эмэ үрдүк буолар. Ленин проспегар турар дьиэ куортама, оччолорго
– 2 000 солк. этэ, оттон ол Лермонтов 28-гар турар дьиэ 4-с этээһэ
1000-ҕа да барбата.
2010 сыллааҕы Росимущество ревизията бу көрдөрөн туран судаарыстыбаны албыннааһыны булан ылар уонна “атастаһыыны” дьиҥэ суоҕунан ааҕар. Урукку салайааччы Данилов мэнэйин, саҥа салалта сууттаһан-утаран көтүттэрэр.
Аны, Федоровыҥ “Сис” Эргиэн дьиэтин нөҥүө, Ленин проспегын 35-н үс сыл куортамҥа биэрэн олордоҕо. Суут суоттаан-учуоттаан баран “Сис” ЭДь Росимуществоҕа 45 мөл. солк. биэриэхтээх диэн уураахтыыр.
Федоров “кулу” диэҥҥэ эрэ мүчүк гынар киһи, “аҕал” диэбиттэригэр аһа маҥхайа сыһар уонна “Сиһин” ыла моҥкурууттататан кэбиһэр. Бүттэ. Моҥкурууттан тугу булан ылыаххыный...
***
Моҥукурууттатыы – суолу сүтэрии
Дьокуускай куорат хаба ортотугар, судаарыстыба бас билиитигэр баар, Аммосов уулуссатыгар турар 18 №-дээх дьиэҕэ «Цемент-Строй» диэн тэрилтэ үөһээ этээстэргэ реконструкция оҥорор. Реконструкция үлэтэ – 68 мөл. солкуобайга сыаналанар. Харчынан төлөһүү барбат, эмиэ “өрөмүөн суотугар” – “Цемент-Стройга” дьиэ 1-кы уонна 2-с этээһин, барыта 1000 кв. миэтэрэни “бэлэхтээн” кэбиһэллэр, ону таһынан “Цемент-Строй” 18 мөл. солкуобайы өссө “ылардаах” хаалар.
“Цемент-строй” ХЭТ бу икки этээһи ылан баран Газпромбааҥҥа 1 кв. миэтэрэтин 2000 солкуобайга куортамныыр. Инньэ гынан сылга 24 мөл. охсон ылар. Ити быһыы үс сылы быһа субуруччу хатыланан, тэрилтэ 72 мөл. солкуобайдаах барыс киллэрэр. Онтон төрдүс сылыгар “Цемент-строй” икки этээһи Газпромҥа 120 мөл. атыылаан кэбиһэр. Онон судаарыстыба дьиэтин суотугар 200 кэриҥэ мөлүйүөн барыһыра түһэр! Кимиэхэ эрэ – барыс буолуо, оттон судаарыстабаҕа – хоромньу таҕыстаҕа...
***
Бу афера кутуруга-сиэлэ билигин да үүнэ турар. Тоҕо диэтэххэ, Аммосов уулусса 18-гар ыытыллыбыт реконструкцияны “Цемент-Строй” ХЭТ-ҕэ “Росбланкиздат” ААО сакаастаан ыыттарбыт. Оччолорго “Росбланкиздаты” Владимир Михалев диэн эмиэ Владимир Даниловка быһаччы үлэтинэн бэринэр, тутулуктаах киһи салайан олорбута.
“Росбланкиздат” урукку салайааччыта - Михалев, Росимуществоҕа Игорь Тресков кэлээтин кытары ууратыллар. Кини оннугар Светлана Заровняева ананар.
Михалев саҥа салалтаны кытары “үлэбиттэн уураттылар” диэн сууттаһар, саат куттарыытын 1,5 мөл. (!) көрдүүр. Чуолаан кини үлэтин дуогабарыгар “үлэбиттэн уураттахтарына 1,5 мөл. солкуобайы төлүөхтээхтэр” диэн суруттарбытын тирэх оҥосто сатыыр. Ама да тэрилтэни баһылаан олорон, өссө буолаары буолан судаарыстыбаннай баайдаах-дуоллаах тэрилтэҕэ кэлэн баран бэйэтэ бэйэтин мөлүйүөнүнэн сыаналана олороро аһара түһүү дии санаабаккыт дуо?! Хата диэбиккэ дылы, суукка Михалев кыайтарар.
***
“Цемент-Строй” ХЭТ, дьиҥинэн, судаарыстыба суотугар 200-чэкэ мөлүйүөнү олордон ылбыт дьон уоскуйуох да эбиттэр. Ол гынан баран, соторутааҕыта «Цемент-Строй» (сал. Захар Токарев) билиҥҥи “Росбланкиздаты” кытары сууттаһан турда. Били, дьиэ 1-кы, 2-с этээһин таһынан, “ылардаах” хаалбыт 18 мөлүйүөнүн ирдэһэн турда. Арбитражнай суут Дьокуускайга да, Читаҕа да “Цемент-Строй” ХЭТ туһатыгар быһаарыы ылынна.
“Росбланкиздат” ААО 18 мөл. иэһин (дьиҥинэн, хантан иэс буолуой!) оннугар “Цемент-Стройга” атын 15 мөл. суумалаах дьиэни биэрэ сатаабыт. Ону ыннарааҥылар сөбүлэспэтэхтэр уонна “Росбланкиздаты” - федеральнай тэрилтэни моҥкуруутунан билинэргэ туруорсан арбитражнай суукка үҥсүбүттэр.
Билигин дьыала-куолу хааһыта хойдон, аны “Цемент-Строй” ХЭТ ол “иэһи” быйыл тэриллибит “Рекат” ХЭТкэ атыылаабыт диэн буолла. Онон билигин “Росбланкиздат” “Рекатка” 18 мөл. солк. иэстээх буолан тахсар.
Бу схема кэннигэр, эмиэ Владимир Данилов күлүгэ барыҥныыра, дьыала ис хоһоонун арыйар дии саныыбыт. “Рекат” ХЭТ салайааччыта – Станислав Салтанов, Данилов Росимуществоҕа үлэлииригэр солбуйааччынан үлэлээбитэ...
***
“Цемент-Строй” ХЭТ, “Рекат” ХЭТ “өҥөлөрүнэн” билигин “Росбланкиздат” ААО бааннааҕы счеттара аарыстанна. Билигин кинилэр бу федеральнай тэрилтэни моҥкурууттата сатыахтаахтар. Биллэн турар, ол төрүөтүн омос көрдөххө киһи өйдөөбөт. Иэстэрин атын дьиэнэн биэрэ сатаатахтарына ылбаттар, чуолаан тэрилтэни моҥкурууттата сатыыллар...
Сыныйан-сылыктаан көржөххө,ол биричиинэтэ биир эрэ буолуон сөп. Владимир Данилов уонна кини куомуннаахтарыгар холуобунай дьыала тэриллэ сатыы-сатыы харар диэн эппиппит. Арааһа, дьыаланы “харыарар” уустугурбут быһыылаах. Өскөтүн силиэстийэлиир уорганнар “Росбланкиздат” ААО 18 мөлүйүөн “иэһиттэн” сылтаан дьыала тэрийдэхтэринэ, судаарыстыба баайын күрэтии атын махинациялара арыллан тахсыахтарын сөп. Онтон, “Росбланкиздаты” моҥкурууттаттахха, холуобунай дьыала тэриллэр төрүөтэ да суох буолан хаалар. “Суохха” туох суута кэлиэй?!
Туйаара НУТЧИНА.
Комментарии
Banque casino fr espace client
References:
https://pad.stuve.uni-ulm.de/s/s0PLkVMSf: https://pads.zapf.in/s/BxcJIzwwCh