Улуус хомуньуустара, ШТЫРОВКА: “Борис ПОПОВ эйигин “Алроса-Нюрба” АК биһиги улууспут ирээт 10% акциятын приватизациялыы сатаабыта” диэн хаһыакка эттэ, ол хайдаҕый?” -  диэн сурук суруйан ыйытан турардаахтар. Онуоха ШТЫРОВ ол “сымыйатын, ПОПОВ-сымыйаччы” диэн хоруй ыытан турар.

Соторутааҕыта Саргылаана ФЕДОРОВА илии баттааһыннаах редакция пчтатыгар сурук кэллэ. Онно бу дьыл бала5ан ыйын 7 күнүнээҕи  "Ньурба" хаһыат 67 №-гэр   "Төнүннэрэр эрэл билигин да баар" диэн  ааҕааччы ыйытыгар сыһыаннаах ыстатыйа тахсыбытын “Аартык.руга” бэчээттииргитигэр көрдөһөбүн диэн сурук киирдэ.

Ааҕааччы ыйытыытыгар улуус баһылыгын көмөлөһөөччүтэ, уруккута Ньурба улууһуттан Ил Түмэҥҥэ дьокутаатынан талылла сылдьыбыт, парламент Сир баайыгар, сир баайын туһаныыга уонна экологияҕа кэмитиэтин салайбыт Анатолий АНТОНОВ “айдааннаах акция” туһунан кэпсээбитэ бэчээттэммит. АНТОНОВ Ил Түмэн 1-кы (М.Е.Николаев саҕана) уонна 3-с ыҥырыылаах мунньаҕар (В.А.Штыров саҕана) дьокутааттаабыта. Дойдутугар Ньурбаҕа төннүөн иннинэ Тиксиигэ үлэлээбитэ.  

 «Ытыктабыллаах Анатолий Степанович! “Батсаапка” уонна интернеккэ бэрт дьикти өйдөммөт иһитиннэрии күүлэйдиир – «Попов Б.Н. -лжец». Ол ис хоһооно маннык: “Ньурба улууһун баһылыга Попов Борис Николаевич 2016 сыл олунньу 20 күнүгэр улуус хаһыатыгар «Алроса-Нюрба» 10 % акциятын туһунан ааҕааччы ыйытыытыгар хоруйдаабыта тахсыбыт. Онно «Алроса-Нюрба» 10 % акциятын кэтэх бас билиигэ (приватизация) ылаары Ил Түмэҥҥэ Штыров В.А көрдөһүү киллэрбит диэн суруллубут. Чопчулаатахха, “План приватизации” диэҥҥэ киллэртэрээри гыммыт. Эн ол кэмнэ ИТ депутата этиҥ уонна ол акциялары көмүскээн туох эрэ дьайыыны оҥорбутуҥ туһунан ахтыллыбыт. Ол туһунан сиһилии кичэйэн дьоҥҥо өйдөнөр курдук быһааран биэр эрэ. Ким дьиҥнээхтик Ньурба улууһун дьонун акцияларын кэтэх бас билиигэ ыла сатаабытый?”

Макаров Евгений Ефремович, 22.08.2016 с.

А.АНТОНОВ: “Дьэ чахчы даҕаны, Ньурба хоммуньуустарын суругар  В.А. Штыров  олус түргэнник уонна баһырхайдык эппиэт биэрэн, Ньурба оройуонун баһылыгын Б.Н.Попову «сымыйаччы» диэн дьаралыктаабыт.   Бу дьон ортотугар араас саҥааны үөскэттэ.

Ити 10 % акциябытын «приватизация» былааныгар киллэрэргэ соруммут кэмнэригэр мин Ил Түмэн депутатынан улэлээбитим,  бу тубэлтэҕэ, кырдьык, мин быһаччы дьайыым баара.

 Ити ыйыллыбыт хаһыакка тахсыбыт суруйуу кэннэ,  олунньу ый бутэһигэр  миигин кытары Вячеслав Анатольевич  көмөлөһөөччүтэ көрсүбүтэ уонна Штыров көрдөһүүтүн тылынан тиэрдибитэ - Ньурба улууһун олохтоохторугар  «Алроса-Нюрба» акциятын приватизация былааныгар киллэрии туһунан быһаарыыны В.А. Штыров бэйэтин тус дьаһала буолбатаҕын тириэрдэр наадалааҕын көрдөспүт.  Хаһан баҕар сүрүн боппуруостар, ол иһигэр Өрөспүүбүлүкэ активтарын, эбийиэктэрин приватизациялааһын Саха Өрөспүүбүлүкэтин Бырабыытылыстыбатын дьаһалынан  оноһулларын тоһоҕолообут. В.А. Штыров көмөлөһөөччүтэ этэриттэн мин өйдөөбүтүм,  «Алроса-Нюрба» 10% акциятын дьылҕатын боппуруоһугар Штыров билиҥҥи  Ил Дархан, ол сахха Бырабыытылыстыба бэрэссэдээтэлэ   Е.А.Борисовтыын бүөмнээн кэпсэтии барбыт.  Мин ити «иһэ истээх» кэпсэтии буолбутун, В.А.Штыров атын киһи оҥорбут «аньыытын» бэйэтигэр ылынар санаата суоҕун тутатына өйдөөбүтүм.

Бу кэмҥэ Ньурба улууһун баһылыга  Б.Н.Попов  сүбэһитэ буоларым быһыытынан, Борис Николаевич  сөбүлэҥэ суох кини этиитигэр  утарааһыны биэрэр бырааба суохпун Штыров көмөлөһөөччүтүгэр сонно эппитим.

Онтон билигин, олохтоох хомуньуустар бэйэлэрин кыахтарынан акцияны приватизациялыы сатааһыны дьиҥнээхтик тэрийбит дьону быһаарбыттарын кэннэ бэйэм санаабын этиэхпин сөп - Борис Николаевич бу боппуруоска  сыыстарар.

Улуус 10% акциятын приватизациялыы сатааһын түгэнин саныыр эбит буоллахха, ол сарсыарда, Ил Түмэн пленарнай мунньаҕын эрэ иннинэ, икки комитет эрдэ бэлэмнээбит раздаточнай докумуоннарыгар (бэрэссэдээтэллэрэ Олесов уонна Уаров)  эбиилик матырыйааллары түҥэппиттэрин билсиһэ олорон өйдөөн көрбүтүм - саҥа киирбит матырыйаалга  Өрөспүүбүлүкэ приватизациялыырга көҥүллүүр эбийиэктэрин уонна активтарын  эбии испииһэгэ киирбит. Испииһэккэ  “Алроса-Нюрба” 10% акцията эмиэ сурулла сылдьарын  тутатына көрөн улаханнык дьиксинним. Докумуон бу кун иннинээҕи күнүнэн бэлэмнэммит, ол аата хайа да кэмитиэт мунньаҕар көрүллэр болдьоҕор эппиэттэспэтин,  үөһэттэн саба суруйуу буолбутун быһаардым. Бу парламент үлэтин регламенын толоостук кэһии буолар. Депутаттар парламент мунньаҕар киирэр  номнуо илии баттаммыт, бигэргэтиллибит сессия матырыйаалларын эрдэттэн билсиэхтээхтэр.

Бу саҥа киирэн биэрбит испииһэги туппутунан  А.С. Уаровка, бүддьүөт хамыыһыйатын бэрэссэдээтэлигэр быһаччы сүүрэн тиийдим. Уаров  ону көрөн, бэйэтэ да соһуйан хаалла: «Бээрэ, бэҕэһээ киэһэ сүр ыксалынан Олесов “Бырабыытылыстыба приватизация былааныгар  умнан  кээһэн киллэрбэтэх улахан суолтата суох  аҕыйах эбийиэктэр, активтар испииһэктэрэ” диэн  илии баттаппыта».  

Онно тутатына Ю.М. Николаевы ыҥырдыбыт уонна биирдиилээн депутаттары кытары суһаллык кэпсэтэргэ диэн быһаарынныбыт. Бу депутаттары кытары биир санаанан салайтаран, үһүөн сөптөөхтүк үлэлэспиппит.  Ол түмүгэр «Алроса-Нюрба» 10% акциятын бакыата приватизация былааныгар киирбэтэҕэ, Өрөспүүбүлүкэ активын быһыытынан хаалбыта. Онон биһиэхэ, ньурбаларга,  акциябытын төнүннэрэр эрэл билигин да баар.

Манна улахан көмөну депутат Николаев Ю.М. оҥорбута. Кини  быһаччы «Алроса» хампаанньа туруорбут депутаттарын кытары кэпсэтиигэ күүскэ үлэлэспитэ. Бу депутаттар үксүлэрэ хампаанньа тус үлэьиттэрэ этилэр.  Бэлиэтиэх тустаахпын, кинилэртэн үгүстэрэ Ньурба улууһун 10% акцияларын приватизация былааныттан таһаарары  өйөөбүттэрэ.

Билигин ыйытыахха сөп, тоҕо бу түбэлтэни мин сиһилии кэпсээтим диэн… Президент В.А. Штыров «Алроса-Нюрба» 10% акциятын приватизациялааһын былааныгар киллэрэ соруммута эбитэ буоллар, хайаан да ону ситиһиэхтээх этэ! Ол кэмҥэ Ил Түмэн депутаттара сүрүннээн промышленнай оройуоннартан турбут депутаттар этилэр. Кинилэри кытары Вячеслав Анатольевич түргэнник уопсай тыл булара уонна Штыров этэрин-тыынарын ол дьон ылынара. Улахан мөккүөрдээх боппуруостарга Вячеслав Анатольевич «ыйааһыннаах»  депуттары кабинетыгар ыҥыртаан кэпсэтэр идэлээҕэ... Ил Түмэн ылынар боппуруостарыгар быһаарыныы онтон тахсар буолара.

Онон, «Алроса-Нюрба» 10% акциятын приватизациялыыр туһунан быһаарыыны В.А. Штыров   ылымматах. Кини буолбатах буоллаҕына, оччоҕо ким диэн ыйытык тахсан кэлэр… Эппиэтин бэйэҕит тобулуҥ.

 

Анатолий АНТОНОВ,

Ньурба улууһун баһылыгын Б.Н. Попов сүбэһитэ”.

***

Инньэ гынан, АНТОНОВ этэринэн, В.ШТЫРОВ президент дуоһунаһыгар олорон “бэйэтин баҕатынан”  ньурбалар акцияларын былдьаабатах эбит, тугу да кыайан быһаарбат, дьаһайбат муҥнаах эбит. Хата, ол саҕанааҕы правительство бэрэссэдээтэлэ чуоккай президени дьаһайар кыахтаах эбит. Аны, ол ШТЫРОВПЫТ “көмөлөһөөччүтэ” аата-суола ыйыллыбатах, баҕар, Мэхээлэ Ээбиристэп буолуо дуу, кимэ эбитэ дуу...

ШТЫРОВ урут-уруккуттан сахалары бэйэ-бэйэлэрин тиксиһиннэрэр адьынаттаах этэ дииллэрэ. Бу сырыыга эттэ эрэ, эппэтэ эрэ... олус “ньурбаларга быһааран” биэрэргэ наһаа кыһаллыбатаҕа буолуо ээ... өссө көрдөһө-көрдөһө.

Уопсайынан, АНТОНОВ суругуттан өйдөөтөххө:  “ПОПОВ сыыһар, ШТЫРОВ  аньыыта суох аанньал, бары актыыбы БАРЫЫҺАП айбардаабыта” – диэн өйдөбүл тахсар. Биллэн турар, АНТОНОВЫ өйдүөххэ сөп – ШТЫРОВ кэмигэр кини далбарга, былааска сылдьыбыта, онон урукку тойонун харыһыйара сэрэйиллэр. Оттон БАРЫЫҺАП кэмигэр “көскө” Тиксиигэ сылдьан баран, бу дойдутугар баһылык көмөлөһөөччүтэ буолан кэлбитэ аҕыйах кэм буолла. “Акцияны төннөрөр эрэл баар” диир буоллаххына, оттон төннөрө сатаа эрэ, Анатолий Степанович. Кытаат! “Ким эрэ, тугу эрэ эппитэ, үһү-бадах, тамах” диэн аралдьыппакка.  

***

Aartyk.Ru