Десант маҥнайгы күнүгэр И.М.Сосин аатынан оройуоннааҕы киин бибилэтиэкэ дириэктэрэ Елизавета Корнилова, улуустааҕы байыаннай комиссариат салайааччыта, подполковник Аял Петров, Ф.Г.Охлопков аатынан Майатааҕы орто оскуола учуутала, саппааска сылдьар хапытаан Владимир Эверстов, улуустааҕы ыччат уонна дьиэ кэргэн управлениетын исписэлииһэ Павел Судико, Р.Г.Васильев аатынан кыраайы үөрэтэр мусуой научнай үлэһитэ Александр Эверстов, бибилэтиэкэ эдэр үлэһитэ Татьяна Васильева уонна Ф.К.Попов аатынан Баатара орто оскуолатын кадет кылааһын үөрэнээччитэ Федор Егоров састааптаах бөлөх Бүтэйдээх уонна Алтан нэһилиэгин оскуолаларыгар сырытта.
Бүтэйдээх оскуолатын үөрэнээччилэрэ бука бары байыаннайдыы таҥнан кэлбиттэрэ десант кыттыылаахтарын астыннарда. Оскуола аактабай саалатыгар ыалдьыттар тэрээһин туох суолталааҕын туһунан оҕолорго сиһилии кэпсээтилэр. Байыаннай комиссариат салайааччыта Аял Петров патриотизм диэн өйдөбүлү оҕолорго быһааран, элбэҕи холобурдаан кэпсээтэ, дойду устуоруйатын хайдах баарынан, чахчыларга олоҕуран үөрэтэ, билэ-көрө сылдьыҥ диэн сүбэлээтэ. Мусуой үлэһитэ Александр Эверстов виртуальнай мусуой нөҥүө Аҕа дойду Улуу сэриитигэр анаммыт муннугу, Федор Попов туһунан чахчылары бэрт интэриэһинэйдик кэпсээтэ. Павел Судико дойду үрдүнэн тарҕанан эрэр, улаатан эрэр оҕолору Ийэ дойдуга бэриниилээх буоларга иитэр-үөрэтэр «Юнармия» хамсааһын туһунан билиһиннэрдэ. Татьяна Васильева Федор Кузьмичка анаммыт ханнык кинигэлэр бэчээттэнэн тахсыбыттарын көрдөрдө. Оҕолор болҕомтолорун ордук Владимир Семенович иитиллээччитинээн Федор Егоровтыын ааспыт үөрэх дьылыгар Казань куоракка байыаннай-патриотическай кулууптар улахан күрэхтэһиилэригэр кыайан-хотон кэлбиттэрин туһунан ирэ-хоро кэпсээбиттэрин тартаран туран иһиттилэр. Кадет уол Федя хараҕын таҥаһынан баайтаран туран, аптамаат сааны хайдах түргэнник ыһарга-хомуйарга сатабылын көрдөрөн оҕолору сөхтөрдө.
Бүтэйдээх оскуолатын сэттис кылааһын үөрэнээччитэ Федот Сергеев улууспут оҕолоро саха норуотун чиэһин Казаҥҥа баран көмүскээбиттэрин үөрэ-астына иһиттим диэн эттэ уонна байыаннай-патриотическай иитиигэ биһиги эмиэ ылсан дьарыктанар баҕа санаалаахпыт диэтэ.
Алтан нэһилиэгин орто уонна Өлөчөйдөөҕү коррекционнай оскуолалар үөрэнээччилэрин нэһилиэк успуорт саалатыгар мунньан эмиэ итинник хабааннаах көрсүһүүнү тэрийдилэр. Үөрэнээччилэр элбэҕи, саҥаны истэн-көрөн, Ф.К.Попов туһунан өссө элбэҕи дириҥэтэн билэргэ баҕа санааларын эттилэр.


****
Виктория БЕЛОЛЮБСКАЯ, 
Мэҥэ-Хаҥалас улууһа.